In dem namen des vater und des sun und heligen^a) geist. Wir Chv/on von Gv/otrat, Chunrat von Aychaim, Chunrat von Wartenvels, Hainrich von Harschirichen, Ott und Chunrat von Goldekk, Vlrich von Wispach und Gotschalich von dem Newenhous gwelt von den zwain pru/edern Otten und Albrehten von Walhen und gesetzt von unserm herren pischolf Friderichen von Salzburch und gepunden mit unserm aide umb allen den chriech, der zwischen den vor genanten Walhern ist zerlosen mit minne oder mit reht nah unsers herren rat von Chiemse und des tvmprobstes von Salzburch und des aptes von sant Peters und nah ir leutt weisunnge, di si uns dar zu/o antwrten hern Chv/onen von Leytten, Haugen Purglær, Wernhers Walthers Grovls sprechen und haben ertailt von unsern aide des alrersten:||
(1.) Umb deu vogtay datz Pilrrse, ist daz, daz der iunge Walher daz bewærn mach, daz sin vater di selben vogtay in nutz und in gwer her pracht hab untz an sin ende und daz er si mit sinen pru/odern auch in nutz und in gwer hat gehabt untz er in ir entwert; er geb im pillich sin gwer wider.||
(2.) Uber deu hundert pfunt, da der hof in dem Prichsental gesetzt warde und auch gelöst, hab wir ertailt: daz er denselben Pfenningen mit dem iunge Walher niht tailen schol.||
(3.) Uber deu hundert pfunt, darumb von der Lebrantzchiricherinne zehen und urbor gelost warde, hab wir ertailt: mach der iunge Walher daz bewarn, daz sin pru/oder im gelobt hab daz selbe gu/ot ze wider legen, er geniez sin.||
(4.) Uber den vogtay, di von dem Preisinger gechoufft warde, hah wir ertailt, wanz iz der iunge Walher an den alten ziuht, der alt sag dar umb bi sinem aide, weder er iz mit im tailen schull oder niht.||
(5.) Umb di stu/opferift hab wir ertailt, swas von den zwain pferiften, di der Pvrlærinne genomen wurden, chomen ist, daz tail der alt Walher mit dem junge und mach der iunge Walher daz bewærn, daz den andern pferift von Ortlieben mit ir paider gu/ot chaufft wurden, er tails pillichen mit im.||
(6.) Umb deu vogtleutt von Tegernse hab wir ertailt: seit si iz paide an di herzogen ziehent, ez geste an siu.||
(7.) Uber daz gu/ot daz Lvchkau hab wir ertailt: wan si iz paide vor ir tail und nah mit einander habent gehabt, si nahen iz auch noh mit einander und swas seid ledig ist warden, ez ensei danne, daz der iunge mit sinen brieven und mit den leutten, di pi ir tail gewesen sint, bereden mu/eg, daz iz .im ainen angevallen si.||
(8.) Umb di vogtay datz Niederhaim, daz geste an dem Berihtersgademer, swem si ir iehen und gunne, der hab si.||
(9.) Uber hern Lvdwiges chint und des Druchsetzen chinde hab wir ertailt: man vrag diuselben chinde, oh si iz haben gehabt von der Walher vater, so nemen iz von den Walhern paiden iedent si sin von dem Hohensteiner, so nemen iz von dem alten Walher.||
(10.) Uber deu speiz, deu ouf ir paider vestn waz, ertail wir: ez sei der alt Walher dem iunge nihtes gepunden, wand si ab dem lande genomen warde. ||
(11.) Umb des Chalbachers chint und umb Hermannes chind sines aidems hab wir ertailt: mach, der iunge Walher daz bewærn, daz sin pru/oder diuselben chinde im gelobt hab ze machen, er geniezz sin an sinem reht.||
(12.) Umb deu dreuhundert pfunt hab wir ertailt: wand si siu paidenthalben gezogen habent an der vorgenannten ir leutt fu/onf und di gesagt haben pi ir aide, daz si umb di Pfenningen niht wizzen, er si der ansprach ledig.||
(13.) Uber daz gu/ot dazz Vnkken hab wir ertailt, wand siz ped ziehent an di lande gwizzen ez geste auch dar an.||
(14.) Uber des alten Walhers chlag hab wir ertailt: des ersten umb den schaden, der auf der vogtay datz Niderhaim geschehen ist von dem junge Walher, mag der alt Walher daz bewærn, daz im der schad in dem fride geschehen si, der iung tu/o in ab nah unser aht rat.||
(15.) Uber den schaden datz Pilrrse hab wir ertailt: ist daz der iunge Walher sinen tail behabt an derselben vogtay, wirs prechen dann dar Uber daz zitlich si. ||
(16.) Uber diu swaig datz Chalnperch hab wir ertailt: mach der iunge Walher daz behüben, daz daz selbe gu/ot e mal sin pfant si gewesen, e iz der alt Walher chauft, er gniezz sin an sinem reht.(17.) Uber daz gu/ot datz Schattv hab wir ertailt: ez geb der iunge dem alten sin gwer wider.||
(18). Uber di Saluedichsen lehen, der si von dem herzogen iehent hab wir ertailt, iz geste an dem hertzogen.||
(19.) Uber datz halbe pfunt geltes datz Eabensperch hab wir ertailt: mach der iunge Walher bewærn, daz Fridrich von Vnfridinge im daz selbe gu/ot ze chauffen hab geben auz nutz und auz gwer, di si im pede wider gaben, e er iz chauft, er setz in wider an sin gwer.||
(20.) Uber den zehent in der Levganch hab wir ertailt: mach Ditmar von Rævt datz bewaarn, daz er im gesatzt si mit des erzpischolf hant, e er dem alten Walher gelihen wrde, sin geniezz Ditmar an derselbe satzunge.||
(21.) Uber deu leutt, di der alt Walher gechauft hat von dem Hohpurgær besunderlichen her nach, mach der alt Walher daz behaben, daz er si im ainem chauft hab, so hab wir ertailt: er schull si aine haben.||
(22.) Uber deu zwai gu/ot datz Louer ze Chaufhauser hab wir ertailt: mach der iunge Walher daz behaben, daz si ir vater in nutz und in gwer hat gehabt und im si hat gelazzen, er gniezz sin an sinem reht.||
(23.) Umb daz gu/ot datz Laimgrv/ob und umb den Frowen hab wir ertailt: mach der iunge Walher daz pringen, daz er mit sampt sinem pr/oder purchgraue gewesen si datz Playn und datz Salekk, er gniezz sin an derselbem lehenschaft.||
(24.) Uber deu Altmannsswaig in dem Glemme hab wir ertailt: wand si Ott von Lampoting Altmanne auf gab vor dem erzpischolf und von Altmanne ledig ist worden, swenn ir der erzpischolf nu gibt, der habs.||
(25.) Umb Arnolten von Smiding hab wir ertailt: nah vier ir vor genannten leutt sag, daz er des alten Walhers si wand er im in gab wider Hainrichen von Awe.||
(26.) Uber ein lehen datz Diespach hab wir ertailt: seit sin der alt Walher sinen herren hat den pischolf von Regenspurch ez beleit im, er well iz danne gu/etlichen tailen mit sinem pru/oder.||
(27.) Uber ein gu/ot datz Horhaim hab wir ertailt: wand si iz auf den heutigen tag in nutz und in gwer mit einander gehabt haben, si haben iz noh mit einander.||
(28.) Uber Hinterdæchs hab wir ertailt: wand sin der alt Walher mit gwalt entwert ist, im antvrt der iunge sin gwer wider und erman in danne sines rehtes mit priefen oder mit der gwizzen. ||
(29.) Uber diu alben ze Æntwelde hab wir ertailt: wan si ir vater zu/o den gu/ot leit und in nuz und in gwer da zu/o gehort und si der alt Walher also in nutz und in gwer gehabt hat, si beleih im pillichen.||
(30.) Uber di zehent saum honiges und umb ein pferift und umb pfunt pfenningen hab wir ertailt, daz der junge Walher dem alten ihtes gepunten si darumbe.||
(31). Umb deu dreiz pfunt, di der Rieder gab dem junge Walher, hab wir ertailt, daz der selbe Walher dem alten ihtz gepunten si.||
(32.) Umb den Oulchropf hab wir ertailt: welle si der iunge Walher ain haben, er geb sinem pru/oder funf zehent pfunt pfenninge.||
(33.) Umb allen den andern schaden, der mit schrift niht veriht ist an disem prief, welle wir, daz er au uns geste zwischen in minnchlich und vreuntlichen nach der su/on ze verihten.||
Wir Fridrich von gotes gnaden der erzpischolf von Salzpurch tu/on allen den chunt, di disen prief ansehent, daz Ott und Albreht unser pru/oder von Walhen disen schidung in unser hant gelobt habent ze behalten und bestætigens auch mit unserm insigel, daz wir an disem prief haben gegeben und ist diseu schidung geschehen datz Salzburch nach Christes geburtt tausend iar zwei hundert iar und aines und ahtzk iar an dem ahten Tag sand Andrees.||
SD.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 122-125.