Ad perpetuam rei memoriam. Nos Fridericus dei gracia sancte Salzburgensis ecclesie archiepiscopus apostolice sedis legatus clarere et notum esse cupimus universis, quod cum per mortem strennui viri Heinrici de Ernuels vasalli nostri superius castrum Strechawe nobis et ecclesie nostre noviter vacavisset, pro infeodacione dicti castri preces hinc inde accepimus a diversis. Nos vero ad incorporandum nos et ecclesiam nostram amori et defensioni illustris domini Alberti de Habspurch et Chyburch comitis langravii Alsacie serenissimi domini nostri Rudolfi Romanorum regis primogeniti et eiusdem per Austriam et Stiriam vicarii generalis ad honorandum eum sicut amicum nostrum predilectum desiderium convertimus speciale. Castrum itaque superius Strechowe et totum montem illius cum omnibus et singulis feodis, que ex morte memorati Heinrici per districtum provincialis iudicii vallis illius id est usque ad Mænlich sursum et usque in Hohenwarth deorsum et usque in Nagelpach a meridionali latere in Thurone et ab aquilonari usque Vlinsperch vacaverunt nobis et ecclesie Salzburgensi eidem domino Alberto conferimus et contulimus iusto feodi titulo perpetuo possidenda. Insuper etiam castrum inferius Strechawe et montem illius cum omnibus et singulis feodis, que Wlfingus et Ortolfus fratres de Trewenstein infra memorati iudicii terminos id est intra Hohenwart, Nagelpach, Vlinsperch et Mænlich a nobis legittime tenuerunt, similiter in ipsum transferimus ipsique conferimus et contulimus iure feodi, ut dicti fratres et heredes eorum, si quos genuerint, ab ipso domino Al(berto) et heredibus suis masculis idem castrum et feoda debeant feodi titulo inantea retinere. Ipse vero affectui nostro, quo in hac parte ipsi sinum vere amicitie et devocionis expandimus recte dilectionis bravio et digne vicissitudinis recompensa occurrens animo gratuito et accurrens castrum novum in valle Anasi, quod wlgariter daz Nevhous dicitur, et totum montem illius cum duabus curiis adiacentibus pratis et pascuis viis et viarum exitibus ab antiquo tempore ad curias illas et castrum de iure et consuetudine pertinentibus nobis et ecclesie nostre nec non successoribus nostris donat donavit dedit et tradidit iusto proprietatis et dominii titulo sicut unquam melius valere potest et debet tradicio perpetuo possidenda. Et de evictione proprietatis dicti castri novi et suorum attinencium predictorum nobis donatorum nobis et ecclesie Salzburgensi promisit et tenetur cavere efficaciter suo et heredum suorum nomine sine omni malo ingenio bona fide. Nos vero e converso de evictione feodi castrorum Strechawe predictorum et ad illa sicut pretactum est pertinencium et per nos collatorum eidem cavere sibi et suis heredibus masculis fideliter et sine dolo efficaciter promittimus et tenemur. Ne autem quod in premissis de pleno et expresso fidelium nostrorum utrimque consilio et consensu provide ac legaliter extat actum, inimica memorie absorbeat oblivio, presentem litteram sigillo nostro et suo muniendam duximus pro perpetuo robore firmitatis. Et sunt testes huius rei: venerabiles fratres nostri domini Wernhardus Seccouiensis ecclesie episcopus, Heinricus abbas monasterii Admontensis scriba Stirie, Liupoldus archidiaconus et vicedominus noster per Marchiam et viri nobiles domini Wernh(ardus) de Schovmberch, Vlricus de Tovuers, Erchengerus de Landesher, Fridericus de Lengpach, magister Chunradus olim scriba Austrie, magister Bentzo prefati domini Alberti prothonotarius, ad hec fidelis nostri Otto de Walhen, Heinricus de Radekk, Chunradus de Wartenuels, Ekhardus de Dobreng, Gotschalcus de Castro novo et plures alii fide digni. Dat. et actum Wienne anno domini millesimo CC^moLXXX^mo secundo, V idus novembr.||
S.^a) S.^b)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 127-128.