+ ++ In nomine sancte et individue trinitatis amen. ++ + Eberhardus dei gratia Salzburgensis archiepiscopus, apostolice sedis legatus, omnibus hanc paginam videntibus imperpetuum. Cum decor domus (vgl. Ps. 25,8.) domini per augmentum luminarium feliciter augeatur, merito iudicamus necessarium et honestum, ut ea, que per nos facta sunt, divinitus hac in parte et honestate temporali gaudeant et nobis nostrisque antecessoribus nec non et successoribus in salutem transeant animarum. Ut igitur ea, que ad luminarium fecisse dinoscimus supplementum in maiori ecclesia Salzburgensi, que nos ad apicem tante extulit dignitatis, cuius exaltationi et decori intendere non immerito nos oportet, universis perpetuo pateant evidenter per ordinem et loca et numerum lampadarum nec non redditus ad hec datos tenore presentium taliter declaramus. Inprimis siquidem in medio summi chori statuimus in rota lampades esse quinque, item summo altari lampades septem deserviant, quarum una nulla hora diei deficiet atque noctis. Ad hec ante ymaginem crucifixi similiter statuimus lampades esse quinque, item coram sancti Ru/oberti altare ordinavimus esse septem et ante tumbam ipsius in cripta statuimus esse unam, que die non deficiet atque nocte. Demum statuimus, ut sancto Virgilio due lampades deserviant, quarum una tempore nullo similiter extinguetur. Sicut igitur in premissis et numerum et loca competentia ordinavimus lampadarum, ita subsequenter redditus, qui ex vacatione feodorum et per emptionem tantum nobis quomodolibet accesserunt, qui sufficiant decrevimus annotari: inprimis quidem Mo/ering mansum et in Riuthaîm mansum et locum modicum, qui dicitur Sulze, cum omnibus decimis, quas olim habuit comes de Meglînge in feodo a nobis, item aput Surheîm et Glân redditus undecim librarum, item in Appeno/vwe redditus quinque librarum, item in parrochia sancti Viti in Pongo/vwe redditus duarum librarum, item aput Rastat iuxta Piberswelle caseale parvum, demum aput Zyrlstal redditus duodecim solidorum cum premissis dedimus pleno iure. Ut autem hec nostra ordinatio et locatio lampadarum, quibus per illum, qui pro tempore custos fuerit ecclesie memorate, ministrari in virtute precipimus, bona fide et donatio reddituum perpetua gaudeant firmitate, presens instrumentum exinde confectum sigilli nostri munimine iussimus roborari contra quemlibet, qui presenti instrumento presumpserit aliqualiter obviare, excommunicationis sententiam promulgantes. Data aput Mu/oterdorf, anno domini M°CC°XXX°VIIII°, pridie kal. ianuarii, indict. XI^a.||
SD.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 491-492.