Nos Eberhardus dei gracia Salzburgensis archiepiscopus, apostolice sedis legatus, tenore presencium tam presentes scire volumus quam futuros, quod dominus Heinricus pincerna de Habspach proprietatem castri Lihtenberch cum omnibus attinenciis hominibus scilicet et possessionibus cultis et incultis, quesitis et non quesitis pro quadringentis marcis argenti Wiennensis ponderis et pro redditibus decem marcarum in officio nostro Libenz nobis nostreque ecclesie tradidit ad emendum eidem eciam de bonis infeudatis, quantocius nobis decem marcarum redditus vacare ceperint, conferre feudaliter promittentes ita, quod dictus pincerna ipsorum bonorum noster sit auctor, quod gewer vulgariter appellatur, supradictum castrum de iure cum omnibus attinenciis ab omnibus et singulis impetentibus defendendo. Pro dicta vero summa peccunie usque ad festum apostolorum Petri et Pauli venturum proximo ipsi pincerne pleniter exsolvenda venerabilem fratrem nostrum Sekowensem episcopum obligavimus pro marcis centum, ita quod si fortassis dominum episcopum infra idem tempus decedere contigeret^a), quatenus easdem centum marcas dominus Fridericus de Betto/v pincerne solvere teneatur. Item dominum Hertnidum de Betto/v pro centum marcis obligavimus eidem, dominum Chunradum de Horneke pro marcis centum, et dominum Chunradum quondam magistrum cellarii pro marcis centum similiter obligantes, ita quod si dominum Chunradum de Horneke ab hac luce subtrahi contigeret^a), nos vice sua easdem centum marcas pincerne solvere ap(ud) Frisacum, ubi tocius debiti solucio debet fieri, protestamur. Et si forte pincernam infra terminum solucionis dicti debiti non contigeret^a) esse superstitem, fratri pincerne assignanda erit tota peccunia supradicta, ut eandem ad usus convertat fllie sui fratris, quam pincerna de consensu dilecti amici nostri illustris ducis Austri^b) in familiam tradidit ecclesie Salzburgensi, ad hoc se similiter obligando, quod si eadem filia fratris sui decederet, quatenus filium fratris sui ecclesie nostre^c) in familiam obtineret. Ut autem sepedictus pincerna omnia et singula prenotata obligatus sit attendere et inplere, excommunicacioni domini pape atque nostre voluntarie se subiecit, ita eciam quod omnia bona sua similiter subiecta sint ecclesiastico interdicto. Ad hec super huiusmodi contractu nobis illustris ducis Austrie litteras in huius pagine concordiam promisit similiter in evidens huius rei testimonium obtinere. Et ut hec omnia perpetuo gaudeant robore firmitatis, hanc scribi paginam iussimus nostrique sigilli munimine roborari, hos testes similiter annotantes: Heinricus venerabilis Sekowensis episcopus, B(ernhardus) prepositus Frisacensis, O(tto) de Chunegesperch, F(ridericus) et Her(tridus) fratres de Betto/v, Vl(ricus) de Lihtensteîn, E(berhardus) de Schonensteîn, Ditmarus de Aicheîm, Ch(unradus) de Horneke, Gotfridus Cheltzo et alii quam plures. Acta sunt hec aput Frisacum in hospicio domini episcopi Sekowensis, anno domini M°CC°XLIII°, indict. prima.||
SD.^d)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 565-566.