Nos Hermannus de Chranechperch et Hadmarus de Schonenberch ac eciam Hertnidus de Ramensteîn hoc scripto notum facimus universis, quod cum domino nostro Eberhardo Salzburgensi archiepiscopo super castro Risperch contractum vendicionis inivimus ita, quod ipsum castrum cum singulis nemoribus atque silvis areis et pomeriis attinentibus ipsi castro nec non hominibus, qui werchperliûte vulgariter appellantur, adiunctis eciam quatuor personis de genere militari videlicet domino W/olfingo de sancto Stephano, domino Libhardo cognomine Chetzer et Murrone Hertwico, Wolfkero eciam Murrone de Twingenberch ipsi domino archiepiscopo sueque Salzburgensi ecclesie tradidimus libere ac eciam vendidimus^a) pro quingentis marcis argenti ponderis Frisacensis. Ad hec eciam predium attinens ipsi castro, quod urbor vulgariter dicitur, ipso^b) domino archiepiscopo dedimus ad emendum redditus videlicet marce cuiuslibet culte vel desolate pro marcis decem numerate pecunie Frisacensis, redditus vero marce infeudate pro marcis quinque denariorum Frisacensium et similiter distrahentes. Item decimas in Levdenaerperge, Chyênperge, Laedin et Polan, quas ego Hatmarus^b) de Schonenberch feudaliter tenui, tamquam predium sive urbor ipsi domino archiepiscopo tradidi ad emendum octo videlicet modios^b) utriusque grani pro unius marce redditibus conputatis. Hac insuper littera protestamur, quod tocius pecunie supradicte argenti et denariorum partem terciam tenemur recipere in instanti, secundam vero partem terciam in festo beati Martini nunc venturo, partem quoque ultimam in festo nativitatis domini proximo veniente. Et si forte secunda solucio scilicet in festo beati Martini ex parte domini archiepiscopi aut sui successoris, si eum non contigerit esse superstitem, vel eciam ex parte Salzburgensis ecclesie nostro nomine non daretur, domino Ditmaro de Griuen et domino Levtfrido de Eppenstein, qui prefatum castrum tempore medio reservabunt, quibus eciam ipsum castrum usque ad proximam sextam feriam nomine Salzburgensis ecclesie promisimus assig[na]re, tunc centum quinquaginta marcas denariorum Frisacensium de prima tercia pecunie nobis iam solute tenebimur defalcare de ipsa tercia centum quinquaginta marcas similiter retinen[tes, si n]eglecta fuerit solucio nobis in festo nativitatis domini facienda. Et tunc eciam dominus Ditmarus de Griuen et dominus L(evtfridus) de Eppenstein nobis restituent castrum Risperch ita tamen, quod qui[cquid reman]serit ultra trecentas marcas, quas recipere tenebimur de parte pecunie iam solute, occcasione solucionum statutis temporibus neglectarum ipsi domino archiepiscopo vel ecclesie Salzburgensi ex i[ntegro reddere] teneamur, antequam per dominum Ditmarum de Griuen et dominum L(evtfridum) de Eppensteîn nobis castrum Risperch fuerit restitutum. Preterea confitemur, si usque ad festum nativitatis domini vel ante [quocumque tempore] plenaria solucio tocius debiti contingentis super contractu vendicionis castri Risperch aliisque suis attinenciis, sicut superius est expressum, domino Ditmaro de Griuen et domino L(evtfrido) de Eppensteîn fuerit [assignata, idem] tantocius castrum Risperch potestati sive dominio Salzburgensis ecclesie assignabunt super hoc ipsi archiepiscopo prestito sacramento. Item dominus Ditmarus de Griuen et dominus L(evtfridus) de Eppensteîn [fide data promiserunt] nullam nobis partem pecunie assignare de solucione secunda vel tercia eis danda, nisi prius uxores nostre filii eciam atque filie cum aliis heredibus domini Raimberti de Mureke b[one memorie d]onacionem castri Risperch cum omnibus suis attinenciis prenotatis domino archiepiscopo fecerint aut suo nuncio speciali, illud similiter protestantes, quod super impeticione Rudolfi de Ras [suique fratris coheredum^c) et] matris eorum partis hereditarie castri Risperch eiusque attinenciis domino nostro archiepiscopo fideiussorem dedimus dominum Levtfridum de Eppensteîn tali modo, nisi nos infra annum ipsi Rudolf[o suisque cohered]ibus de iure satisfecerimus, ex tunc dominus Levtfridus de Eppensteîn quintam partem Rudolfum de Ras eiusque coheredes contingentem ipsi domino archiepiscopo reddere teneatur, d[um tamen in Fri]saco, Vanstorf, Graetze vel Libenz vel eciam in valle Lauent dominus archiepiscopus super hoc locaverit nobis diem. Ut igitur omnia prenotata robur obtineant firmitatis, [pro evidenti te]stimonio et cautela cum subscriptione testium sigilla nostra appendimus huic carte. Sunt eciam huius rei testes: Otto prepositus Salzburgensis, V/olricus prepositus apud Traberch, W(ilhelmus) comes in Hevnenburch, V/ol(ricus) comes de Sterenberch, dominus Ditmarus de Griuen, dominus Otto de Matrey, dominus Ortolfus de Moetniz, dominus Cvtschalcus^b) de Nydekke, dominus L[ev]tfridus de Eppensteîn, dominus Albertus Swergebel, dominus Richerus de Paigerdorf, Merchlinus de Percheîm, Heinricus de Stalle, Werenhardus de Sikingen, Heinricus de Dorenberch, Eberhardus de Wenge, Albertus de Scherenperch et alii quam plures.||
Acta sunt hec in Frisaco, VII° idus octobr., anno domini M°CC°XL°V°,||
indictione quarta.||
S.^d) S.^e) S.^f)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 625-626.