Chunradus dei gratia sancte Salzpurgensis ecclesie archiepiscopus apostolice sedis legatus, Emcho Frisingensis et Heinricus Ratisponensis ecclesiarum episcopi universis presentium inspectoribus salutem in domino. Ad curam pastoralis officii, in quo et per quod nomen superintendentis accepimus, attente considerationis oculos convertentes satagimus sollicite et multis vigiliarum sollicitudinibus cogitamus, ut quietis et pacis comodum ac libertas status ecclesiastici taliter conserventur, ne nostris temporibus vilescat sacerdotium et per nostras provinciam et dyocesim princeps provinciarum facta sub tributo sponsa Christi ecclesia ancilletur. [< vgl. Thren. 1,1] [Esth. 16,4 >] Nosque non solum in ore hominum verum etiam in conspectu iudicis cuncta cernentis pro eo quod in demolitione vinee domini dei Sabaoth nos murum non opposuimus cancellato pastoris nomine mercennarii nuncupemur. [< Ezech. 13,5] Quia igitur contra libertatem et emunitatem ecclesiasticam non solum in dyocesibus verum etiam in provincia nostra prelati capitula et alii ecclesiarum rectores ex angariis et perangariis ac aliis indebitis prestationibus seu exactionibus hactenus multipliciter sunt gravati et in presentiarum etiam aggravantur, nos ex continuatione mali huiusmodi sequelam pessimam formidantes ad conservandam libertatem status ecclesiastici talem pactorum ac confederationis subivimus unionem videlicet quod mutuum consilium et auxilium nobis ad invicem prestabimus et sententias excommunicationum privationis suspensionis in personas interdicti ac cessationis in terras, quas unus ex nobis tulerit in eos, qui offendunt vel nituntur offendere per quascumque exactiones seu prestationes eeclesiasticam libertatem, cuiuscumque preeminentie condicionis seu status persone fuerint, alii duo ratas et firmas tenebunt et ipsas sine malo ingenio et exquisitis coloribus pro viribus fideliter exequentur, ita scilicet, quod si contra inhibitionem nostram, quam ex nunc quilibet nostrum promisit prout citius sibi oportunitas adesse poterit promulgare. Abbas prelatus seu persona alia in dignitate constituta prestationem exactionem per se vel per interpositam personam dederit seu dare promiserit seu pactum fecerit de futuro in preiudicium libertatis ecclesiastice quemadmodum est premissum, ex tunc a prelatura seu dignitate sua cadat. Capitula vero et conventus, qui hoc nostrum mandatum non attenderint interdicti et suspensionis sententias incidant ipso facto, plebani autem et perpetui vicarii seu alii ecclesiarum rectores et beneficiati suas perdant ecclesias et beneficia similiter ipso facto, si contrarium huic nostre prohibitioni ausi fuerint acceptare. Temporales vero vicarii in eodem casu deliquentes^a) a sua removeantur dyocesi nec perpetuo a nobis habere in nostris dyocesibus mansionem aliquam permittantur et si in aliquem rebellionis spiritum se erexerint, remittantur episcopo, a cuius dyocesi propter predictam transgressionem recesserant ad angustias carceris detrudendi. Promisimus autem fide data mutuo vice prestiti sacramenti, quod in supradictis omnibus quo ad libertatem eeclesiasticam dumtaxat conservandam nobis succurremus consilio auxilio et favore et non solum expensas et impensas si quas idem negotium in inpugnatione alterutrius ex nobis sustinuerit seu in missione nunciorum ad sedem apostolicam sive ad serenissimum dominum nostrum Romanorum regem sive ad quascumque personas, que nobis in hac nostra causa succurrere poterunt, contribuemus communiter secundum proportionem facultatum et a nostris faciemus subditis, quorum causam gerimus et quos idem tangit negotium, universaliter conportari, verum etiam et nostras et nostrorum fidelium personas castra et munitiones ad propulsandam huius ecclesiastice libertatis iniuriam exponere et opponere murum pro domo Israel [< Ezech. 13, 5] promittimus et in hac causa, in qua nos solum zelus domus dei comedit [< Ps. 68, 10] nos mutuo viriliter adiuvare et quia perversorum temeritas nos non permittit esse contentos antiquarum penarum moderamine constitutiones reverendi patris et domini quondam Gvidonis tituli sancti Laurentii in Lucina presbyteri cardinalis fungentis legationis officio in nostra provincia super captivitate canonicorum kathedralium ecclesiarum seu personarum aliarum constitutarum¹⁾ in aliqua dignitate et nostri provincialis concilii editas volentes in suo robore omnimodis perdurare edocti malitia temporis subsequentis adicimus, quod captivatores eorundem, ut eo magis in conspectu omnium sint abhominabiles et vilescant ad quemcumque locum etiam extra dyocesim, in qua a divinis ob eorum cessatur delictum seu malitiam venerint et pernoctaverint illa parrochia quamdiu ibi ipsi vel eorum conplices ac participes facinoris moram traxerint, immo et post recessum ipsorum cessetur omnimodis a divinis per tres dies continue subsequentes et ad penas alias contra eosdem prout expedire visum fuerit procedatur, ut si continuam mansionem habere ceperint in eadem, tunc decanatus totus illius parrochie subiaceat ecclesiastico interdicto. In quorum omnium^b) testimonium et evidentiam presentes litteras mutuo ad invicem dedimus sigillorum nostrorum munimine roboratas. Dat. Teising anno domini millesimo ducentesimo nonagesimo quarto, XIIII kal. octobr.||
S.^c) S.^d) S.^e)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 218-220.