Albertus dei gracia Romanorum rex semper augustus universis sacri Romani imperii fidelibus presentes litteras inspecturis graciam suam et omne bonum. Et si cunctis Romano subiectis imperio ad exhibicionem graciarum et benivolencie regalis excellencia sit debitrix, illis tamen non indigne specialitate quadam invenitur liberior, quorum devocionis ampliora sentit insignia et obsequiorum fructus laudabiles experitur. Hinc est, quod venerabilis Cunradi Saltzburgensis archiepiscopi principis nostri karissimi, qui puritate fidei devocionis integritate et serviendi perseverancia nostram sibi munificenciam vendicavit, ut propriam sinceris precibus favorabiliter annuentes concedimus et indulgemus eidem, quod forum Altenhouen in Karinthia prope Frisacum ad montem sancti Thome transferat ibique fortalicium ad usus et utilitatem ipsius et ecclesie sue construat et fortificet prout necessarium et utile sibi fuerit et ecclesie memorate, ut homines et bona ipsius pace et commodo gaudeant ampliori, ad instar et similitudinem eximie recordacionis quondam Rudolfi Romanorum regis¹⁾ genitoris nostri karissimi, qui translacioni predicte iuxta tenorem litterarum suarum voluntatem suam et consensum plenum adhibuit et expressum, innovantes approbantes et auctoritate regia confirmantes, que circa translacionem seu fortificationem predicti fori seu fortalicii per genitorem nostrum prefatum vel regem Adolfum²⁾ indulta fuerint et concessa. In cuius rei testimonium presentes litteras scribi et nostre maiestatis sigillo iussimus communiri. Dat. in castris apud Znoymam anno domini millesimo trecentesimo septimo, XVI kalend. novembris, regni vero nostri anno decimo.||
S.^a)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 289-290.