Wir Chu/enrat der Helbinch und Seyfrid von Rotenburch veriehn und tu/en chunt an disem brief, daz wir mittem herm Gebhart von Velben und mit hern Herman von Perchaim von unsern baider herren wegen und gewalt ainen trewn satz und frid haben gemahet ze behalten in aller irr herschoftt an lauten und an gu/ot an geferd an alæin datz Chernten, daz auz dem vrid genomen ist, von dem tag hiut an sand Andres tach untz auf den næhsten suntach nach sand Luceintach und den selben tach uber und uber und swaz in der frist von unsers herren lauten von Chernden wrd tan unsers herren læuten von Saltzburch, dar zu/e pinden wir uns mit unsern trewn, daz daz gentzlich an alz geverd widertan werd von mir Chu/onraten dem Helbing, rihter ze Insprukk, alz verr meins herren gepiet von Chernden geraichen mach und sol mir dez gehelffen mit gantzen trewn Seyfrit von Rotenburch; so pind ich Seyfrit von Rotenburch mich al ze legen von meiner frawn læuten der chuniginn, die in ir gepiet gesezzen sind. Und zu/e einen waren urchund der vorgenanten tæiding gebn wir mit unsern insigel disen prief versigelt. Der ist geben datz Rauht^a) an sand Andrestag, do von Christes gepurtt waren drutzehen hundert iar dar nach in dem ahten iar.||
S.^b) SD.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 295-296.