Ich Chunrat von Chalheim vergich offenbar an disem brief und tu/on chunt allen den, di in sehent eder ho/erent lesen, daz ich von grozzer gu/elt und von ander notdurft, di mir swa/erlich anlag, verchouft^a) han meinem gena/edigen herren ertzbischolf Friderichen^b) von Salzburch und seinem gotshous umb anderthalb^c) hundert pfunt Salzburger pfenning, der er mich gar und ga/entzlich gewert hat, mein gericht ze Chalheim mit sampt dem purchstal, da daz hous ze Chalheim etwenn ouflag, daz ich und mein vordern von im und von dem gotshous ze Salzburch ze lehen haben gehabt, und han im daz geben mit alle deu und dar zu/o geho/ert, besu/ocht und unbesu/ocht mit allen den rechten, als ez mein êne, mein vater und ich her haben pracht, daz an einem tail sto/ezzet an daz Talgêw, an dem andern tail an der Tanner gericht^d) und an dem dritten tail an der Radekker meiner o/eheim gericht^d) und han mir fu/erbaz dhein vorderung noch dhein recht dar an behalten. Dar u/ober gib ich im disen brief zu/o einem urchu/end der worheit versigelten mit^e) meines lieben herren und o/eheim hern Chunrats des tu/omprobsts ze Salzburch und mit hern Nyclas und hern Ekharts der Tanner, mit meines o/eheims hern Ru/egers von Radekk anhangenden insigeln und ouch mit mein selbes insigel^c). Der brief^f) ist geben ze Salzburch des pfintztags nach sand Go/ergen tag, do von Christes geburd waren dreuzehen hundert iar dar nach in dem dreu und dreizzigsten iar.||
SD.^g) S.^h) S.ⁱ⁾ S.^k) S.^l)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 402.