Ich Chvnrat gehaizzen von sant Marien tvn chvnt allen den di disen prief horent oder sehent lesen beide di nv sint oder her nach chvnftig sint, daz ich mit gvtem willen mein selbes vnd meiner hovsvrowen vron Margreten vnd meiner chinde Chvnrates vnd Albers meiner svn, Katrein vnd Margreten meiner tochter han verchauft vierdhalbes lehen dacz Ernsdorf di oede sint mit purchrecht vnd aygenschaft, vnd ain lehen dacz Weyden, daz gestift ist vnd dienet achczig vnd sechs phenning, vmb dreiczehen phvnt phenning der gemain munz ze vron Offmein der Aptessinn von sant Bernhart vnd aller der sampnvng, vnd vergich daz ich dez gv^etes genczlich gewert pin, vnd han iz auch auf gegeben mit sampt meiner hausvrowen ledichlich fvr rechtez aygen, vnd wand meinev chint nicht sint chomen zv dem alter, vnd si daz gv^et selb aufgeben, so secz ich den vorgenanten vrowen purgel hern A1mar von Schpeissendorf, hern Levtwein von Dornech, hern Prechtel den Stainpechen, di von aygem willen mit sampt mir vnd meiner hovsvrowen, oder ob ich stvrbe vnd mein hovsvrowe an vns, schulten meinev chint da zv pringen, daz si daz gut auf geben vnd sein gewere sein vnd scherm mit sampt mier, alz landez recht ist, vnd zv pezzer stetigvnge so secz ich den vorgenanten purgeln mein gvt, daz dacz dem Maierhaven haizzet, daz si dar aufhaben, ob in an mir vnd an meinen chinden icht abgieng, vnd gieng auch den vorgenanten vrowen icht ab an den purgeln, di ir scherm sullen sein nach landes recht, so schullen si auch auf dem vorgenanten gvt haben mit sampt den purgeln. Vnd wand ich nicht ein aygens insigel han, so giw ich in disen prief versigelten mit dem insigel dez erweren mannez genant her Seyfrid der Apt von Altenburch vnd auch mit dem insigel meines (bis) herren, hern Stephans von Meyssawe der Marschalch ist in Oesterich. Diser dinge sint geczevg her Adlolt vnd sein svn her Hainreich vnd herr Chvnrat von Cheyaw, her Haug vnd herr Ott von Liechtenvels, di dienstherren sint in Oesterrich, her Wolfhart von Durrenpach, her Ott von Nevnburch di ritter sint, her Hainreich der Wilperger, her Gotschalich von Vronhoven, her Vlrich von pevgen vnd ander frvmer levt genvg, di pei dem chauf warn. Disev dinch sint geschehen, da von Christes gepurd waren tavsent iar vnd zwai hvndert vnd Nevnczik vnd Nevn iar an sant Philips vnd an sant Jacobs tag.

Source Fulltext: ZEIBIG, Stiftungsbuch (=FRA II/6, Wien 1853) S. 276-277