Ich Ortolf gehaizzen der Grille Tuen chunt an disem brief allen livten, di in sehen oder horen lesen nu oder her nach, daz mein vater her Hainreich der Grille, dem gott genad, da er starb, der liez mier nievne meiner geswistreid ze besorgen vnd subentzig pfunt zegelten, di ich gelten mu^est von den sachen vnd ouch von anderm vngelu^eke tievrer vnd herter iar vnd vnfrids ward ich so notig, daz ich vor rechter armut vnd notichait must verchouffen meinen hof da ze obern Nelib. den er mi^er lazzen het, den selben hof han ich mit verdahtem mut und mit gutleichem willen mein selbs und meiner geswitereid, Reichgarten, Li^evkarten vnd Margareten vnd meiner housvrowen vron Alhaiten vnd meiner chind Li^evtweins, Vlreichs, Hainreichs, Ortolfsrad mit aller meiner freund und geerben willen vnd rat verchoufft vmb zwai minfunftzch (sic) pfunt pfenning wienner munzze, der ich aller scho^en gewert pin vron Elspeten der Aeptessinn datz sant Bernhart vnd i^er samnung. Der hof dient alle iar sechtzich meczen chorns, viertzig metzen gersten, zwaintzch metzen habern vnd aein halb pfunt phenning ouf sant Michels tag vnd zwelif ches ze weinnachten, ze ostern, ze pfingsten, ie ze der hochzeit vier, vnd zwo gemast gense, vier huenrr vnd sechtzig ayer. Den selben hof, der mich von meinem vorgenanten vater vnd von meinen vodern an gevallen ist, den gib ich ouf mit allem recht, als ich vnd mein vodern den gehabt haben von der graschaft ze hardeke, Ich vnd mein vorgenante housvrowe vnd mein vorgenante chinde vnd mein vorgenant swester Reichgart vnd Livkart mit irn chinden, vnd Margret mein swester, di noch junchvrow ist, wi^er vnd alle vnser geerben, wir geben den hof ouf vnd vertzeihen vns sein ledichleichen vnd gentzleich mit gemainem rat, vnd gutleichem willen vron Elspeten der vorgenanten Aptessinne vnd ir samnung datz sant Bernhart vnd irm schaffer bru^eder fridreichen in sein hant nach des lands recht in Osterreich, mit meines herren Graf Perchtolds von Hardek vnd mit hern Heinreichs des iungen von Schowenberch gunst, vnd mit ir baider gu^etem willen vnd mit ir hant, als ouch ir baider Ingesigel an disem brief bewern, daz die Samnung vnd daz Chloster datz sant Bernhart den selben hof ewichleichen haben schulle gernbichleich an all anspraeh vnd mit allem nutz vnd mit allem recht, als ich vnd mein vodern den von der Grafschaft gehabt haben. Vnd wand wir nicht aygner ingesigel haben, so geb wir zu einer bestetigung vnd ewigen vestnung ditz dings der vorgenanten Aptessinne vnd ir samnung datz sant Bernhart disen brief versigelten mit den Ingesigeln der edln herren in Osterreich, meins herrn graf Perchtolts von Hardekk vnd hern Hainreichs des iungen von Schowenberch di vorgenant sint, vnd hern Stephans von Meissaw des Marschalchs in Ostereich, di ouch ditz dings gezivg sint. Daruber sind ouch gezivg her Hainreich vnd her Chunrat dy Cheyower, her Vlreich der iung herr von Meyssaw di dinstherren. Herr Vlreich, her Ott di Pu^ertorfer. her Herwart von Hoven. her Vlreich der peygarter. her Pillunch di rytter, Vlreich, Livtwem, Jans di Gru^enpeken. Ortolf der Grille vnd Hiltprant Grille vnd ander freuner livt genu^eg. Ditz dinch ist geschehen vnd diser brief ist gegeben ze sant Bernhart in dem Chloster an sant Michels tag, do darnach an den nahsten weinachten christus Jesus vnser Herr nach der mensschait het alters ganczer iar Tousent vnd dreu hundert vnd sechs iar.||
Wir Graf Perchtold von Hardek, Heinreich von Schowenberch, Stephan von Meyssow veriehenvnd gesten aller der red, als hie vor geschriben stet, vnd dar vber zu einem vrchund geb wir vnser Ingesigel an disem brief dem vorgenanten Ortolfen vnd den vrowen von sand Bernhart, als si mit einander geworven haben.

Source Fulltext: ZEIBIG, Stiftungsbuch (=FRA II/6, Wien 1853) S. 202-203