Ich Ruedger der Piber von Gruenberch vnd ich vrow diemuet sein howsvrow vnd ich vrow Marigret sein tochter vnd ich Vlreich sein svn. Wier veriehen vnd tuen chvnd allen den die nu lebent, vnd her nach chunfig sint, die disen brief an sehent oder horent lesen, daz wier mit guetem willen vnd mit verdachtem muet vnd mit zeitigem rat aller vnserr frewnt ze der zeit, da wier ez wol getuen machten, verchouffet haben unser hovs ze Gruenberch vnd allez daz dar zve gehoret mit allem dem recht vnd nucz, alz wier ez haben inn gehabt in aygens gwer, vnd ez von vnsern vodern an vns chomen izt, an ein mu^el vnd ein hofstat vnder dem vorbenanten hovs ze Gruenberch, di nem wier ouz mit allem dem recht vnd nvcze alz wier sew vor haben inn gehabt. Daz ander allez, daz zv dem vorbenanten hovs geho^ert ze veld vnd ze dorffe, gestift vnd vngestift, gepowen vnd vngepowen, swie daz benant izt, daz hab wier ze chouffen geben dem erbern herren hern Vlreichen von Meyssow, dem Marschalich in Ostereich, vnd allen seinen eriben vmb sechs hvndert phvnt wienner phenninge, vnd vmb zwainczk phvnt wienner phenninge, der wier recht vnd redleich sein gewert, ze verchouffen, ze verseczen vnd geben, wem si wellen an allen ierrsal. Dar vber zv einer pezzer sicherhait secz wier vns, Ich ruedger der vorgenant Piber vnd ich Vlreich sein svn, vnd ich Vlreich sein prvder, vnd ich Vlreich sein aydem der Frey ze rechten schermen vber daz vorgenant hovs, und vber allez daz, daz dar zve gehoret, fuer Arnolten dez ebenanten ruedgers svn, der zv seinen iaren nicht chomen izt, wann der zv seinen iaren chom, daz der allez daz leisten scholl, dez recht ist, vnd daz wier gelaist haben, vnd dar zve fu^er alle anschprach alz aygens recht izt in Ostereich, dez wier purgel vnd geczevg sein mit sampt vnsern insigeln. Waz si dez schaden nemen mit dem recht, den schullen si haben auf vns vnd ovf allem dem guet, daz wier haben in dem land ze Ostereich, daz lob wier in mit vnsern trewn. Daz disew red stet vnd vnzebrochen beleib, dar vber geb wier in disen brief zv einen ewigen gezevg diser sache versigelten mit vnsern insigeln vnd mit den erbern gezevgen, di hie benant sint, her Houg der Tuers vnd her Reinprecht der Tuers von Liechtenvels, her Hainreich von Cheyow, Alber vnd Wernharten die Strewnen, Alber von Ottenstain, Chunrat vnd Ott die prueder von Liechtenekke, Reinprecht von schonberch vnd andere erbere leut genueg, den di sache wol chund vnd gwizzen ist. Diser brief ist geben ze Chrumnow, da von Cristes gebu^erd warn ergangen Tawsent iar, drew hvndert iar, vnd dar nach in dem achczehenten iar an sand gilgen tag.

Source Fulltext: ZEIBIG, Stiftungsbuch (=FRA II/6, Wien 1853) S. 259-260