Ich Gevhart Havges svn von Stranczendorf tvn chvnt an disem prief allen levten, di nv sint, oder di her nach chvnftig sint, di in sehent oder lesen horent. Daz ich mit wol verdachtem mvt vnd mit gvtlichem willen mein selbes vnd meiner hovsfrowen vron ... vnd aller meiner vodern verchavft han zehen phenning geltes rechtes purchrechtes, di man mir gedient hat an sant Miehels tag von anderthalben Jevch, di da ligent in dem pirichech dem erwern vnd geistlichen vrowen dacz sant Bernhart mit allem dem recht in aygens gewer als ich iz gehabt han von meinen vorvodern vmb fumfthalben schilling phenning, der ich recht vnd genczlich gewert pin, vnd zv gewizzer bestetigvng dicz dinges gib ich den vorgenanten vrowen dacz sant Bernhart disen prief versigelten mit meinem Insigel. Gezevg dicz dingez sint Chvnrat noechtleib, Heinrich avf dem Cygerperch, Jacob der Amman vnd Stephan sein svn. Dicz ding ist geschehen vnd diser prief ist gegewen da man raitt von christes gepvrt drevezehen hvndert iar vnd siben vnd zwainczig iar an sant Thomans tag.

Source Fulltext: ZEIBIG, Stiftungsbuch (=FRA II/6, Wien 1853) S. 222-223