Wir Graf Hainreich von Schovmberch vnd vnser Brueder alle vnd wir graf Chunrat ir veter von Ort veriehen vnd tun chunt allen den, di disen prief lesent oder horent lesen, di nv lebent vnd her nach chunftig sint, daz wir mit vnser Erben guetem willen vnd gunst vnd mit wol vereintem rat ze der zeit, da wir iz wol getu^en mochten, Lauterleich durch Got vnd durch vnser vrown willen vnd auch durch vnser vnd aller vnser vordem sel hail willen haben gegeben den erbern vnd den geistleichen vrowen der Samnvng datz sant Pernhart di aigenschaft vier pfunt pfenning geltz, di si gechovft habnt von hern Pillvngen vnd ligent dacz Naelib auf holden vnd auf aekkern vnd auf andrem guet, fu^erbaz ledichleichen ze haben mit allem dem nucz vnd recht, als wir di selben aigenschaft inne habn gehabt. Vnd daz disev sache also fu^erbaz staet vnd vnzebrochen beleib, dar vmb so geb wir Graf Hainreich von Schovmberch vnd wir Graf Chunrat von Ort den vorgenanten vrown datz sant Pernhart disen prief zv einem offenn vrchunde vnd zv einem warn gezeug diser sache versigelten mit vnsern Insigeln. Der prief ist gegeben dacz wienne in der Stat nach Christes gepurt drevtzehen hvndert iar, dar nach in dem acht vnd dreizzigisten iar an sand agnesen tag der heiligen magt.

Source Fulltext: ZEIBIG, Stiftungsbuch (=FRA II/6, Wien 1853) S. 203-204