Wir Albrecht von gotes genaden Herczog ze Oesterreich ze Steyr vnd ze Kernden Tvn chvnt offenlich mit disem prief, daz wir den erweren vnd geistlichen Chlostervrowen von sant Bernhart durch vnser vnd vnser vordern sel hail vnd saelde willen di genad getan haben vnd tvn auch mit disem prief, daz si alle iar sechczig fveder salcz, di man nachkendev fveder nennet von vnserm hal ze halstat in ier Chloster fveren schullen an maut vnd an alle ierrvng. Da von gepieten wir allen vnsern amptleuten, den der prief geczaigt wiert, ernstleich vnd wellen, daz si den vorgenanten chlostervrowen von sant Bernhart an dem vorgeschriben holcze (salcze) chein irrung tvn in deheinen weg, wand wir in daz ierlichen an iern ampten abslahen vnd daz in disev genad also stet vnd vnzebrochen beleib, dar vmb so geben wir in disen prief besigelten mit vnserm insigel, der geben ist ze Wienn an sant Jacobs abent des zwelfpoten nach Christes gepurd drevczehen hvndert Jar, dar nach in dem vierczkisten Jar.

Source Fulltext: ZEIBIG, Stiftungsbuch (=FRA II/6, Wien 1853) S. 287-288