Wier swester Anna genant Aptessin vnd di samnung gemain dacz sant Bernhart vergehen offenlich an disem prief alle den di in sehent oder horent lesen paide den gegenbu^ertigen vnd auch den chunftigen, daz di gu^elt, di da leit dacz czelderndorf auf anderthalben lehen, der da ist an traed vnd an phenningen virdehalb phunt wienner munzz, di man iarchlech dint an sant michels tag, daz di der erber herr her Ott der gnemhertile Capplan dacz vnser vrowen auf der Steten ze Wienn vergolten hat mit seinen phenningen also beschaidenlich, daz wi^er im oder swem er di gv^elt schaft oder geit, all iar raichen schullen ze sant michels mess vncz an sein tod, vnd dar nach schol man di selben gu^elt alle iar inantwurten seiner tochter swester margreten dacz sant Bernhart, daz si seiner sel dester andechtichleicher gedench hincz got vnd auch ier selb gutleich do von tu^e, vnd nach ierm tod schol di gu^elt pei vnserm chloster beleiben also dacz wier alle iar czwen iar tag do von begen igleichen mit vierczehen schilling, ainn an vnsers herren leichnam tag, der ander an sant peters vnd an sant pauls tag, so wier pest mugen, vnd sein vnd seiner vorvarunden sel do pei hincz got ewichleichen gedenkin, tet wi^er dez nicht, so schol er uns ermanen czwier oder drierstund, versaumpt man es dannoch, so schol sich der vorgenanten gu^elt der Apt von Altewurk vnder winten vnd schol ez in seinem chloster begen, als vor geschriben stet, vnd dar vber zv einem offen vrchunt diser sach so geb wi^er dem vorgenanten heren hern Otten den gegenburtigen prief versigelten mit vnserm insigel vnd mit vnsers convents insigel. Der prief ist geben nach Christi gepurd dreuczehen hundert iar dar nach in dem sechs vnd vierczigistem iar an sant georgen tag des heiligen martres.

Source Fulltext: ZEIBIG, Stiftungsbuch (=FRA II/6, Wien 1853) S. 302