Wier swester Anna Aptessinn dacz sant Bernhart vnd di sampnvng alle veriehen vnd tven chunt allen den, di disen prief lesent oder horent lesen, di nv sint oder hernach chvnftig sint, daz vns der erber mann Michael der Chaltenpech purger von Zwetel vnd sein hausvrowe vro Elspet habent gegeben zwelf phvnt phenning, vnd vmb di selben phenning hab wir chauft ein phvnt geltz auf einem lehen dacz prvn also beschaidenlich, daz wir in vnd allen ieren vodern vnd nachchomen einen ewigen iartag an Gotes leichnams tag nach vnsers ordens gewanheit legen schullen, vnd an dem selben tag schol vnser schaffer vnserm convent ain dienst raichen, alz vil daz phvnt tragen mag daz wi^er ir^e sel vnd ir^e vodern sel an dem selben tag mit vnserm gepet dester vleizzichlicher gedenchen. Wer awer daz, daz wir oder vnser schaffer savmig warn, oder nicht begiengen den iartag, so schullen ir erben oder wer den prief inn hat, vnz munen ainez oder zwier, pezzeriet wier sein denn nach nicht, so schullen si sein mit vnsrem gvtem willen an allen ieren schaden bechomen mit phenten oder swie ez in aller pest fvegt von alle dem gvt, daz wier haben in dem land ze Oesterreich. Vnd daz di sach staet vnd vnzebrochen beleibe, dar vvber gew wi^er in vnd ieren erben disen prief zv ainem warn geczevg vnd ewiger vestigung versigelt mit vnsrem insigel. Der prief ist gegeben da von Christes gepurt ergangen warn drevczehen hvndert Jar, dar nach in dem fumfczigistem iar an sant Agnesen tag.

Source Fulltext: ZEIBIG, Stiftungsbuch (=FRA II/6, Wien 1853) S. 271-272