Anno domini Mill. CC. XL^o. VIII^o. Ego heinricus de Rohaz¹ notum esse cupio tam presentibus quam futuris. quod cum inimico humani generis. instigante gwerrarum tempore abbati et conuentui Monasterii sancti Pavli de lavent in eorum bonis ad sanctum Lavrentium² iniurias et dampna grauia intulissem iniuriose asserens ad me in prefatis bonis iudicium sanquinis pertinere. licet deo teste sub iuramento dicam et secure dicere valeam. quod nec ego nec pater meus nec progenitorum meorum aliquis prout mihi paterna et antiquorum narratio ac predictorum abbatis et fratrum sine interruptione longa et quieta eiusdem iudicii et aduocatie a rivo minoris Lvbenz vsque in rivvm welik possessio demonstravit aliquid iuris actenus habuimus. nam patris mei temporibus venerabilis pater tunc abbas monasterii sancti Pauli³ loci predicti ab illustre viro dno Livpoldo bone memorie duce Austrie et styrie collationem per illustrem dominum Heinricum olim ducem Karinthie de prefatis bonis cum iure advocatie et iudicio sanquinis ac omni prorsus libertate et utilitate eidem monasterio factam iuxta terminos adnotatos petiit et obtinuit solempniter confirmari.⁴ hoc adiecto non in signum dominii sed in fauorem monasterii memorati quod hii qui propter culpam propriam mulctandi sunt pena mortis. postquam de morte eorum coram eorum iudice in predictis bonis diffinitiua sententia fuerit promulgata isdem iudex reum vel reos nobis nudum vel nvdos rebus eorum dno abbati integraliter reseruatis super rivvm minoris Lvbenz tamquam sententie executori debet si commode fieri poterit assignare. Hiis omnibus consideratis animo diligenti tanto amplius toto corde doleo de commissis quanto dampnabilius contra predictos abbatem et fratres contra eorum libertates et iura per huiusmodi excogitatam maliciam me sentio proh dolor deliquisse. Ea propter ne tam enormis adtemptata presumptio ad meos liberos aut posteros derivetur. et materiam eis tribuat delinquendi. ecce coram deo et sanctis eius in quorum conspectu consisto marhpvrkh in ecclesia sancte Thome apostoli. liberaliter pro me et meis liberis sev heredibus cedo et renuntio huic pessime actioni tum propter deum. tum etiam quia uenerabilis pater dominus Livtoldus⁵ abbas monasterii supradicti irrogatas per me sue ecclesie iniurias relaxauit. ac mediantibus subnotatis condicionibus promissis. cum penis adiectis. renuntiauit trecentarum marcarum pecunie summa quam apud marhpurkh foro predicto dominus Hertwicus olim eiusdem Monasterii abbas in sollempni iudicio coram nobile viro dno Wlrico Comite de phanberch tunc iudice provinciali presente dno nostro Fridrico illustri duce austrie et styrie⁶ pro irrogatis ecclesie sue iniuriis in memoratis bonis a me sibi solvi obtinuit iusti iudicii sententia mediante. Ego enim meo et liberorum sev heredum meorum nomine liberaliter spondeo et ad obseruationem huiusmodi promissorum fidem meam sev omnes proprietates meas obligo. quod quicumque nostrum ex nunc predicto monasterio de dicto iudicio per querelas questionem mouerit aut alias defenderit auxilio. consilio vel fauore ad solutionem si rerum meorum heres esse uoluerit teneatur pecunie memorate. Promitto insuper predicta pena mediante. coram principe terre quam cito dominus de eo nobis duxerit prouidendum errorem meum publice recognoscere ac presentes litteras sui sigilli munimine roborare. Et ut hec rata permaneant presens instrumentum non solum sigillo proprio verum etiam sigillis ducis Karinthie et filii eius⁷ac multorum honorabilium. meis precibus consignatum predicto monasterio assignaui. $$Actum et datum marpurch anno predicto. die lune post festum Jacobi sub multorum testimonio feliciter. Amen.

Source Fulltext: SCHROLL, Urkundenbuch St. Paul (= FRA II/39, Wien 1876) S. 133-135