Wir Wilhelm von gotes gnaden herczog ze Österreich ze Steyr ze Kernden vnd ze Krain graf ze Tyrol etc. bekennen vmb die stösse vnd misshellung die gewesen sind zwischen den erbern geistlichen vnsern andechtigen Hermann von Swannberg¹ vnd Casparn dem Smukchen² von wegen der aptey ze sand Pauls in dem Lauental, daz si darumb willichleich hinder vns sind gegangen vnd habent vns versprochen mit irn trewn stet ze halten vnd ze volfueren, was wir daruber spreehen nach laut der instrument irs hindergangs, die si vns darueber gegeben haben. Nu haben wir nach vnserr herren vnd ret rat zwischen in auzgesprochen vnd sprechen auch wissentlich mit diesem brief: des ersten, daz si für sich vnd all ir freund helffer vnd diener darumb gen ainander guot freund sein vnd hinfuer mit ainander nichts suellen haben ze schaffen. Auch sprechen wir, daz si baid von der egenanten aptey ab suellen sein vnd vns all ir brief vnd rechten, die si von vnserm heiligen vatter . . dem pabft von Rom, von dem von Salzburg oder andern bischouen vns vnd vnsern schreibern vmb dieselbe abtey habent, in vnser gwalt vnuerczogenlich antwurten vnd daz die auch fuerbazz kain krafft haben suellen in dhainen weg. Dieselben baid tail suellen auch mit sampt andern irn conuent bruedern ainen auz in zu derselben aptey erweln vnd dem genczlich gehorsam vnd gewertig sein in allen sachen als ander ir conuentbrueder, als irm rechten apt vnd als gewoenleich vnd recht ist. Wir sprechen auch, daz der egenant Caspar alles das heiligtum, alle die brief puecher klained silbergeschirr infel stab ornaet vnd alle die sluessel, die zu dem Sagrer vnd dem goczhaus zu sand Pauls gehoerent, die er dauon hat emphrömdet vnd entfuert vnd auch alle andere varende hab, die er vngeuerleich noch vor handen hat vnd die auch dem goczhaus zugehoerent, hinwider gen sand Pauls dem gegenwertigen erwelten apt sol antwurten vnd geben genczleich an alles vercziehen vnd geuerd. Auch sprechen wir, daz derselb new apt, der nu zu der aptey mit vnserm willen wirdt erwelt vnd gesetzt, den egenanten Hermann von Swannberg die kirchen zu sand Laurenczen mit aller zugehoerung vnd Casparn dem Smukchen die pharrkirchen zu sand Merten in dem Lauental vnder Rabenftain oder aber die pharrkirchen zu vnserr frawn ze Fresen in dem Trawalt, welche derselb Caspar darunder aufnemen welle mit allen zugehoerungen, sol inantwurten vnuerczogenlich vnd sy der an nucz vnd gewer seczen, daz si die von im innhaben vnd niessen an alle irrung ir lebteg oder daz si verrer beraten werden. Wir sprechen auch, welcher tail vnder den egenanten Hermann vnd Casparn disen vnsern spruch an ainem oder menigerm stuke ueber fuer, das wissentleich waer, der sol von seiner egenanten kirchen, die wir im gesprochen haben, als vor geschriben steet vnd auch von seiner phruende vnd allen den rechten, die er zu sand Pauls hat, gar vnd genczleich geschaiden sein vnd der apt vnd der conuent daselbs sind im nichts mer schuldig ze geben vnd sol auch fuerbazzer ewichleich nichts mer hincz in haben ze sprechen mit recht noch an recht, gaistleich noch weltleich in dhainen weg. Wo er aber dawider fuer keme, da suellen si haben behabt vnd er verloren vnd ist auch darczu in vnsere swere vngnad geuallen vnd der erwirdig vnser besunder lieber freund der von Salczburg oder der apt daselbs zu sand Pauls sol in jar vnd tag in ainem chercher darumb swerlich pessern an geuerde. Mit vrchund dicz briefs geben ze Grecz an Eritag vor sand Gregorien tag nach Kristi gepuerde vierczehen hundert iar darnach in dem ersten iar. – Unter der Falte: ,Dominus dux per se sed consilium audiuit‘.

Source Fulltext: SCHROLL, Urkundenbuch St. Paul (= FRA II/39, Wien 1876) S. 297-299