In nomine domini amen. Anno a natiuitate eiusdem millesimo quadringentesimo tricesimo nono, indictione secunda die Mercury quarta mensis Februarij hora vespertina uel quasi pontificatus sanctissimi in Christo patris et domini nostri domini Eugenii diuina prouidentia pape qvarti anno octauo in mei notarii publici et testium infrascriptorum presentia constitutus personaliter venerabilis in Christo pater dominus Johannes preporitus ecclesie Lauentine alias sancti Andree vallis Lauentine habens et in manibus suis tenens quandam appellacionis papiream cedulam quam animo et intencione prouocandi et apellandi ad sacrosanctam synodum Basiliensem eiusque auditorium alta et intelligibili voce legit interposuit apostolosque pecijt ac alia fecit, que in ipsius appellacionis cedula continentur, cuius tenor sequitur per omnia in hec verba: Eterna dei iusticia que minus iuste opressis manum defensionis et auxilii solet rite petentibus salubriter impartiri, caute prouidit, hy¨s qui per noxios potentum affectus iniuste opprimuntur, posuit per appellacionis remedium rationabiliter se tueri. Hinc est quod ego Johannes prepositus ecclesie Lauentine ordinis sancti Augustini canonicorum regularium animo prouocandi et appellandi ad sacrosanctam synodum Basiliensem vniuersalem ecclesiam representans vice et nomine dicte ecclesie mee propono et dico grauique expono cum querela, quod cum inter me ex vna et venerabilem in Christo patrem dominum Johannem abbatem monasterii sancti Pauli in valle Lauentina ordinis sancti Benedicti Salczburgensis dyocesis parte ex altera de et supra certis decimis parrochialibus infra limites parrochie ecclesie mee predicte contentis et spectantibus ad eandem verteretur materia questionis litis ac controuersie, quas decimas dictus dominus abbas leuat et occupat, ego Johannes prepositus supradictus prefatum dominum abbatem racione peticionis earundem decimarum ipsarumque occasione inquirere conueni coram venerabili in Christo patre et domino domino Georio canonico et officiali curie Salczburgensis ad quem de juris disposicione pertinuit cognitio dicte cause. Qui quidem domino (sic!) officialis eundem dominum abbatem per suas certi tenoris litteras citatorias sub excommunicacionis pena ad certum peremptorium terminum legittime citauit et ad sui presenciam euocauit realiter ut est consuetum. Huiusmodi itaque termino actuque pendentibus dictus dominus abbas eandem causam ad illustrem principem dominum Fridericum ducem Austrie iuniorem duxit et deduci procurauit contra et aduersus inhybicionem per dictum dominum officialem sibi super hoc specialiter factam meque Johannem prepositum supradictum coram eo traxit in forum vetitum contra ecclesiasticam libertatem et canonicas sanxiones et omnia provincialium conciliorum statuta et presertim contra diue memorie Friderici et Karoli Romanorum imperatorum statuta de et super hoc salubriter edita et promulgata, volens ut creditur et intendens se sic tueri ecclesiasticum quoque forum declinare seque ab obediencia domini nostri Salczburgensis eximere, gaudensque de protectione domini ducis supradicti se reddidit coram prefato domino officiali omnimodo rebellem et contumacem. Idemque dominus officialis contumacia et rebellione huiusmodi exigentibus ipsum dominum abbatem excommunicauit et excommunicatum denunciari mandauit publice ac manifeste. Ipse vero dominus abbas tempore excommunicationis et denunciationis cum non habebat personam standi in aliquo iudicio, me denuo coram prefato domino principe traxit in causam et contra me temporaliter procedi procurauit. Idemque dominus meus dux, in cuius iurisdictionem numquam consensi, sua sentencia licet iniusta ymo verius nulla si sentencia dici meretur nullitas et de facto me et ecclesiam meam gravando ipsas decimas predictas ipsi domino abbati adiudicauit me ad huiusmodi sentenciam talem qualem minime vocando. Hysque non contentus, sed ut mala malis accumulentur magisque ecclesiastice iurisdictionis libertatem eneruare possit et violare; idem dominus abbas ante absolucionem debitam super hoc obtentam iurauit stare iuri et mandatis ecclesie. Contra huiusmodi iuramentum iterum et tertio ad videndum taxare expensas quas ad quingentas libras denariorum Wyenensium enarrat se fecisse procurauit me citare prout hoc in dicti principis citacione clarius patuit et sunt expressa, nitens me et ecclesiam meam molestare perturbare et inquietare multis modis prout asseritur et concuciatur in graue mei dicteque ecclesie mee preiudicium dampnum et grauamen. Verumque non nvmquam quod coniectura profuturum credidit, subsequens experiencia nocuum esse ostendit. Itcirco ego Johannes prepositus persepedictus senciens me dictam meamque ecclesiam ut premissum est esse multipliciter grauatam timensque verissimiliter in futurum fortius posse grauari, ab vniuersis et singulis molestacionibus perturbacionibus inquietacionibus grauaminibus comminacionibus quibuscumque ac omnibus aliis apud dictum principem per ipsum dominum abbatem attemptatis sew attemptandis et quibusuis in premissis contra me facientibus michi illatis sew inferendis et presertim a sentencia dicti illustris principis et domini ducis tamquam ipsius sentencie iudice non competente contra me licet nulliter lata et expensarum taxacione ac quacumque execucione super premissis a prefato principe facta sew fienda ad sacrosanctam synodum Basiliensem vniuersalem ecclesiam representans eiusque auditorium in hys scriptis prouoco et appello, appellatosque primo secundo tertio instanter instancius et instantissime peto, quamuis unito contextu verborum, si aliquis sit, qui michi eos dare velit et possit, subiacens me dictamque meam ecclesiam immo vniuersa bona mea mobilia et inmobilia presencia et futura cum omnibus michi adherentibus et adherere volentibus protectioni tuicioni ac defensioni dicte sacrosancte synodi Basiliensis ipsiusque audiencie ac iuridice diffinitioni. Protestor eciam quod hanc meam appellacionem infinuare volo dicto domino abbati et omnibus quibus de iure fuerit et est insinuanda eamque prosequi temporibus et eciam oportunis, saluo iure addendi minuendi corrigendi mutandi aliam vel alias appellacionem uel appellatos de nouo interponendi tociens quotiens opus fuerit et michi de iure videbitur expedire, ac alijs iuribus et beneficiis michi nichilominus semper saluis. Super quibus omnibus et singulis supradictus ego Johannes prepositus supradictus peto michi per vos notarium publicum confici unum uel plura publicum sew publica instrumentum uel instrumenta. Lecta uel interposita est hec appellacio apud sanctum Andream in Lauent in maiori stuba prepositure ecclesie Lauentine anno indictione die mense hora et pontificatu quibus supra presentibus honorabilibus ac discretis et honestis viris dominis Johanne decano ecclesie Lauentine, Johanne Platan canonico in Solio beate virginis,¹ Stephano Weindl de Messenhausen presbiteris, Cristofforo Rotenstayner armigero, Hainrico Hisstrl (sic!) laico litterato Salczburgensis Frisingensis Lauentine dyocesis testibus ad premissa vocatis specialiter et rogatis.||
Et ego Vrbanus Peylstainer de Pertholdhawfen clericus Ratisponensis dyocesis publicus imperiali auctoritate notarius, quia dicte appellacioni interposicioni prouocacioni appellatorum peticioni protestacioni omnibusque alijs et singulis supradictis, dum sicut premittitur per dictum dominum prepositum fierent et agerentur vna cum prenominatis testibus presens interfui eaque sic fieri vidi et audiui; ideoque hoc presens publicum instrumentum exinde confeci publicaui et manu mea propria scriptum in hanc publicam formam redegi signoque ac nomine meis solitis et consuetis signaui in euidens testimonium premissorum rogatus et requisitus.

Source Fulltext: SCHROLL, Urkundenbuch St. Paul (= FRA II/39, Wien 1876) S. 376-380