Die Pröpste Leonard von Oberndorf, Johann von Grifenthal und Walthasar von Völkermarkt gleichen den Streit zwischen dem Abte Johann von St. Paul und seinem Convente aus, mit Anführung der Bedingungen, unter welchen der Abt auf die Abtwürde verzichten wolle.Vniuersis et singulis quibus presentes innotuerunt pateat euidenter et sit notum, quod orta alias materia dissensionis et controuersie ac discordie inter reuerendum in Christo patrem et dominum Johannem dei gratia abbatem sancti Pauli vallis Lauentine ordinis sancti Benedicti Salczburgensis diocesis ex vna et uenerabiles et religiosos fratres priorem et conuentum monasterii eiusdem de et super cura et regimine dicti monasterii et eorum occasionibus partibus ex altera, idem dominus abbas et conuentus nobis Leonardo monasterii in Oberndorff¹ ordinis sancti Augustini canonicorum regularium Aquilegiensis diocesis et Johanni monasterii beate Marie virginis in Griuental Premonstratensis ordinis ac Balthasaro ecclesie collegiate beate Marie Magdalene in Volkenmarkt Salczburgensis dyocesis prepositis humiliter supplicarunt, vt tamquam boni vicini et in quos tam ipse dominus abbas quam conuentus predicti summam haberent confidenciam, causam dissensionis et controuersie ac discordie huiusmodi inter eos vt premittitur exortam sopiremus et amicabilem ac fraternam inter partes ipsas faceremus concordiam, maxima attenta paupertate monasterii ipsius, quod proh dolor! iam hoc hostili tempore tum propter intestina bella tum eciam per inhumanissimos et religionis christiane inimicos Thurcos in suis redditibus et prouentibus adeo diminutum existit, vt onera monasterio ipsi incumbencia vix et cum difficultate maxima supportari possunt, et si huiusmodi dissensio et discordia inter partes ipsas iuxta rigorem stricti iuris terminari et sopiri deberet, multum dispendiosum esset. Vnde nos Leonardus et Johannes ac Walthasar prepositi prefati, attendentes peticionem huiusmodi fore iustam ac consonam rationi et quod vtile esset pacem et concordiam seminare et discordiam euellere, eciam maxime ponderantes et potissime comodum et vtilitatem ipsius monasterii et eciam parcium, quia litium euentus dubii sunt, que discordia et dissensio si iudicialiter examinari et fine debito terminari deberet, non sine maximo dispendio et incomodo ipsius monasterii fieret; ad quod precauendum ab eisdem priore ac conuentu, qua de causa dictum dominum eorum abbatem molestarent et inquietarent, informacionem recepimus plenariam et cum reperissemus eosdem id facere pro vtilitate monasterii et non in alium finem, quare quod dictus dominus abbas abbaciam huiusmodi in manibus reuerendissimi domini nostri domini Johannis dei et apostolice sedis gratia archiepiscopi Salczburgensis, apostolice sedis legati et ordinarii resignaret, petierunt attento senio sue paternitatis, ita quod maxime hoc hostili tempore huiusmodi prelature absque ipsius dispendio et damno minime preesse posset. Quam quidem resignationem idem dominus abbas modo et forma premissis si facere vellet, ex tunc dictus conuentus eidem domino abbati prouisionem annuam per dictum reuerendissimum archiepiscopum Salczburgensem reseruari procurare vellet iuxta condignum. Iterumque ipse conuentus nobis prepositis prefatis humiliter supplicarunt, ut huiusmodi eorum intencionem et voluntatem prefato domino abbati insinuaremus, ipsi eciam nichilominus a nostro consilio retrocedere vellent, sed condignam facere sequelam: nos ex tunc premissa per dictum conuentum ut supra ponitur, preconcepta predicto domino abbati intimauimus et ad ipsius noticiam deduximus. Qui quidem dominus abbas attendens et ponderans bonum et comodum ac vtilitatem ipsius monasterii, ne eidem ex talis modi dissensione et discordia eueniret aliquod inconueniens, huiusmodi intimacionem libere pro bono pacis in se recepit et ex tunc articulatim prouisionem et pensionem sibi reseruandam conscribi fecit, in omnibus tamen et singulis consensu et voluntate ac auctoritate dicti reuerendissimi domini domini nostri archiepiscopi Salczburgensis interueniente. Quorum quidem articulorum tenor de verbo ad verbum sequitur et est talis: Item primo, quod dictus dominus abbas habeat ecclesiam parrochialem sancti Laurencii² cum omnibus suis iuribus et pertinenciis eo modo, quo ipse prius et alii sui predecessores habuerunt. Item vt ipse suam habitacionem habeat in domo abbaciali ibidem ad sanctum Laurencium. Item vt habeat omnem superioritatem et maioritatem in foro ibidem cum censibus stewris decimis et eciam feodum bey Reyfnick³ vna cum omnibus suis pertinentiis et eciam superioritate. Item quod postquam ipse a monasterio ad dictam ecclesiam sancti Laurencii se transfert, quod ex tunc ad statim conuentus tradat sibi viginti quinque libras denariorum et ex post infra duos menses immediate sequentes viginti quinque libre denariorum per ipsum conuentum assignentur. Item ut sibi eciam cedant singula blada et vina, que hoc anno excreuerunt et que plebanus ibidem imbursare habet vnacum singulis utensilibus ibidem ad sanctum Laurencium existentibus. Item ut ipse eciam ad dies vite sue habeat bona Ryedmacher,⁴ que ipse quondam suis bonis redemit eo modo quousque modo habuit. Item vt similiter ad dies vite sue habeat vineam zu Rasst⁵ vnacum domuncula, quam pro nunc Sarger inhabitat. Item ut annuatim per prelatum pro tempore existentem et conuentum absque diminucione sibi dentur quatuor vasa vini, vnum vas Rasster, vnum vas de cultura in Marpurg et duo vasa vini perchkrecht, que quidem vasa vini ipse dominus abbas per se ipsum in domum suam ducere habebit absque cura prelati et conuentus. Item ut ipse habeat in singulis aquis ibidem existentibus piscari et eciam capere feras demptis mangnis feris, quas tantum prelatus alioquin recipere procurabit, ut ex tunc eciam sine fraude sibi pars sua tradetur sicuti semper moris fuit. Item ut ipse omnia et singula clenodia per ipsum apportata iterato recipere habeat et similiter ea que ipse reperit dum ad abbatiam assumptus fuit, monasterio dimittat sine fraude et dolo. Item singula vestimenta sui corporis que apportauit et que reperit post suum predecessorem ipse recipere habeat absque aliqua contradictione. Item cum ipse a sancto Laurencio recessit, octo vaccas ibidem dimisit ita quod earundem loco sibi dari debeant decem vacce et quatuor boues. Item similiter eciam dimisit in suo recessu ibidem ad sanctum Laurencium octo lectos, qui eciam sibi cedere habebunt vnacum iuis attinenciis, que secum addvxit. Item ut ipse perpetuo sit exemtus ab omni iurisdictione prelati pro tempore existentis vnacum singulis suis presbiteris et parrochianis et quod eandem ibidem in suos habeat iurisdictionem quam ut prelatus habuit. Et postquam nunc recedet, curam animarum recipere habebit a prelato eligendo; in posterum quoad vixerit huiusmodi animarum cura a quoque alio prelato recipere minime habebit; et si ipse in iurisdictione sua per spirituales aut seculares vnquam iniuste tribularetur aut inquietaretur, quod ex tunc prelatus pro tempore existens ipsum defendere et tueri debet. Item ut sit exemptus et liber ab officio et eciam caseis ex officio dictis proprie Petterkass. Item quod ex nunc in suo recessu dentur sibi centum casei ex officio dicti Swaygkaˆss. Item ut eciam recipiet equum suum gradarium, vnum iuuenem mulum et eciam vnam equam seniorem inter iuvenes, quas ipse educauit. Item vt frater Vincencius maneat per triennium aput suam ecclesiam in Fressing⁶ pacifice et absque amocione. Item ut ipse sit exemptus a solucione omnium et singulorum debitorum per ipsum et predecessorem suum quomodo libet tempore sui regiminis contractorum, que debita bona fide tum per litteras tum eciam iuxta condignam racionem quomodo libet appellari possent aut contracta sunt. Item quod omnia expensis conuentus et non suis impetrentur, – Quibus quidem articulis per dictum conuentum antedictis et intellectis, idem domini de conuentu omnia et singula in ipsis articulis contenta eidem domino abbati, resignatione ut premittitur facta et postquam per reuerendissimum dominum Salczburgensem admissa fuerit, rata et grata et sine dolo et fraude obseruare promiserunt et contra ea non facere velle vllo vmquam tempore neque per se ipsos neque per interpositas personas in curia Romana nec extra eam, sed omnia et singula in ipsis articulis comprehensa et per prefatum reuerendissimum dominum Salczburgensem reseruanda firmiter obseruare suo eorum prestito iuramento neque eciam vllo tempore ab huiusmodi iuramentis prestitis absolucionem petere. Et nichilominus ad maiorem cautelam et ut premissa singula in suo robore valitura permaneant, prefatus dominus abbas et dictus conuentus se manibus propriis presentibus nominatim subscripserunt, sigillaque eorum huic carte impresserunt in euidens testimonium omnium premissorum. $$Actum in monasterio sancti Pauli die Mercurii tercia decima mensis Augusti anno domini etc. octogesimo octauo. 

Original dating clause: die Mercurii tercia decima mensis Augusti

Language: Latein

Notes: