UNiversis Sancte Matris ecclesie filiis ad quos presentes littere pervenerint. Nos miseratione divina. Raymundus Juvensis. Franciscus Acciensis. Matheus Langonensis. Franciscus Vrehensis. Bertrandus Assiansis. Nicolaus Xanchiensis. Et Petrus Calliensis. Episcopi. Salutem in domino Ihesu Christo et dilectionem sempiternam. Splendor paterni luminis qui sua mundum ineffabili claritate illuminat pia vota fidelium de clementissima maiestate eius sperancium tunc precipue favore benigno prosequitur cum devota ipsorum humilitas sanctorum meritis et precibus adiuvetur. Cupientes igitur ut ecclesia parrochialis sancti Viti et hospitale extra muros de sancto Vito predicto Salzburgensis diocesis ad laudem dei omnipotentis et memorati sancti Viti fundata congruis honoribus frequentetur et a Christi fidelibus iugiter veneretur. Omnibus vere penitentibus et confessis qui ad dictam ecclesiam et hospitalem singulis sui patroni festivitatibus et in omnibus aliis infrascriptis videlicet Natalis domini. Circumcisionis. Epiphanie. Parasceves. Pache. Ascentionis (sic!). Penthecostes. Trinitatis. Corporis Christi. Inventionis et Exaltationis sancte crucis. Michaelis Archangeli. et in singulis festis beate Marie virginis. Nativitatis et decollacionis sancti Johannis baptiste. Beatorum Petri et Pauli apostolorum. et omnium aliorum apostolorum. et Evangelistarum. In festo omnium sanctorum et in commemoratione animarum et in dicte ecclesie et hospitalis predicti dedicatione. et per octavas omnium festivitatum predictarum octavas habencium. Sanctorumque Stephani. Laurencii. Martini. Georgii. Nicolai. Gregorii. Mauri(tii) et Eligii confessorum. Sanctarumque Marie Magdalene. Margarete. Katerine. Fidis et Cecilie ac Agnetis. Singulisque diebus dominicis causa devotionis. orationis. aut peregrinationis accesserint. Seu qui missis. predicationibus. matutinis. vesperis. Aut aliis divinis officiis exequiis et mortuorum sepulturis ibidem interfuerint. Aut qui corpus Christi vel oleum sacrum cum infirmis portentur secuti fuerint. Vel qui in serotina pulsacione campane flexis genibus ter Ave Maria dixerint. Necnon qui ad fabricam. luminaria. ornamenta. vestimenta. libros. calices. aurum. argentum. Aut quevis alia dicte ecclesie et hospotali necessaria in suis testamentis vel extra donaverint legaverint seu donari vel legari procuraverint manusque porrexerint adiutrices. Et qui pro Reverendo in christo patre Archiepiscopo Salzburgensis harum indulgenciarum confirmatore. Et pro Leone Fabri laico dicte diocesis eiusque parentibus et omnibus benefactoribus ecclesie et hospitali predictis. Seu qui cimiteria predictorum circu(m)ierint impetratore earundem devote oraverint. Quocienscumque quandocumque et ubicumque premissa vel aliquid premis-sorum devote fecerint de omnipotentis dei misericordia et beatorum Petri et Pauli apostolorum eius auctoritate confisi singuli nostrum XL. dies indulgentiarum de iniunctis eis penitentiis misericorditer in domino relaxamus. Dummodo diocesani voluntas ad id accesserit et consensus. In cuius rei testimonium presentibus litteris sigilla nostra apposuimus. Datum Avinione. XXnona die Mensis Januarii. Anno domini M° CCC° Quinquagesimo Primo. Et pontificatus domini Clementis pape VI. Anno Nono.

Source Fulltext: Peter Peusquens, Karlsruhe