Ich Alram Hern Meinharts svn van Sinzenperge vnd min Hausvrow vre Elzpet Eberharts tohter des Steger mitsampt ir Pasen vren Elzpeten wernharts swester des Steger vergehen vnd tvn chvnt an disem brief allen den, di in lesent, sehent oder horent, di nv lebent vnd nach chvmftig sint, Daz wir mit gutlichem willen vnd mit verdachtem mvt ze der zeit, da wir iz wol getvn machten, vnd auch mit vnser vrevnt rat haben gegeben Got vnd vnser vrowen vnd dem Gotshaus ze Gersten di Hub, di da leit auf der Goritz in wartperger pharr, vnd ein Mul vnd vier seld, daz vnser rehtz aigen ist gewesen, an aller chrige, wer aber daz, daz iement pezzer reht wolt haben zv dem vorgenantem gu^et des vorgenantz Gotshaus, der sol an dem nesten sand Michels tag hvndert phvnt phenninge wienner mvnz dem Gotshaus widerchern an allen sein schaden. Daz auch di vorgenant sach vnd gelub vnd red stet beleib vnd vnzerbroehen ewichlich, geben wir ze vrchvnde disen brif mit vnsern Insigeln Alrams des Sintzenperpers vnd mit wernharts Steger ChunRats svn Insigel vnd sint auch zevge der sach mit irn Insigeln Her Ott Scheche, Her Marchart vnd Her Ott Prevhefen mit irn Insigeln. Darzv sint zevge der vorgenanten sach Her Ott hauser ze der zit Purchrof ze Styr was (sic) Ott, Dvrinch, Marchart vnd Richer Stadler, Ott Sintzenperger, Peter ponhalm, Otacher, Nykla stiller, HeinRich enser, ChvnRat chamerer, Richer amptman ze Gersten, HeinRich Muhler vnd Ott Chersperger purger ze Styr. Diser brief ist gegeben, da van christes geburd warn ergangen Drevzehen hvndert Jar, darnach in dem vier vnd dreizigisten Jar an Sand Agnesen tag.

Source Fulltext: OÖUB 6 (Wien 1872) S. 112f., Nr. 104