ICH Chlar und ich Chu^enigu/nt Ulreichs to^echt er des Jo^echtleins der weilent ist gesezzen auf dem Gundelczperg dem Got genad, ich Ymmerinch und ich Junns die Joechtel sein pru^eder wier verjehen mitsampt allen unsern erben ez sein su^en oder to^echter, das wier all miteinander unverschaidenleich mit gesompter hant mit unserm gu^eetlichen willen wolbedacht dem gotshaus ze Ga^ersten haben vrey und ledig lazzen die hausrawm und erbschafft di wier und all unser vorvoder selig mit zuespru^echhen oder mit gewer gehabt haben auf die selben gueter auf dem Gundolczperg gelegen in Ga^erstner pfarr also in der maynung, daz wier dar umb hincz dem selben gotshausz ze Ga^ersten und hincz allen den die di selben gu^eeter hin fu^er besiczent und in ir gewalt mit desselben go^etshauzz herren und appt gunst und willen pringent fu^erbaz chain ansprach nicht mer haben schu^ellen noch wellen weder mit recht noch an recht in dhainen wegen, dar u^eber zu ainem urchu^end der worhait geben wier den prief besta^ett und versigelt mit unsers lieben freundes maister Petreins herczog Albrechts ja^eger anhangunden insigel, wan wier uns da von wier selb nicht aygner insigel haben dar under verpinten, wan er sein unser vo^ergea^er gewesen ist und daz also nach seiner beweisung gehandelt haben, und ist des zeug durich unser vleizzigen gepet willen der erber man Go^etfrid der Sinczenperger mit seinem anhangunden insigel. Der prief ist geben nach Christi gepu^erd uber drewtzehenhundert jar da nach in dem drew und sybenczkisten jar an der heiligen zwelifpoten tag sand Symons und Judas.

Source Fulltext: OÖUB 8 (Wien 1883) S. 664f., Nr. 662