Nicolaus Dei gracia abbas monasterii in Gersten ordinis sancti Benedicti Patauiensis dyocesis commissarius ad infrascripta per reuerendum in Christo patrem et dominum dominum Johannem episcopum Patauiensem specialiter deputatus notum facimus tenore presencium vniuersis, quod nobis pro tribunali sedentibus in nostri notarii publici infrascripti et testium infrascriptorum presencia personaliter constitutus honorabilis et religiosus vir dominus Hermannus Tawer canonicus et plebanus monasterii sancti Floriani canonicorum regularium ordinis sancti Augustini dicte dyocesis procurator et sindicus prepositi et conuentus dicti monasterii, prout de ipsius sufficienti mandato coram nobis producto constetit, petiuit, discretum virum dominum Chrisogonum rectorem parrochialis ecclesie in Waldchirchen dicte dyocesis eciam ibidem presentem et ad ipsius domini prepositi instantiam legitime citatum compelli iuris remediis oportunis ad solucionem pensionis quatuordecim librarum denariorum Wyennensium de fructibus dicte parrochialis ecclesie per ipsum Chrisogonum et quemlibet pro tempore plebanum ibidem dicto preposito et conuentui debite, in singulis anni quatuor temporibus tres libras cum dimidia, realiter exhibendarum^a). Dictusque Chrisogonus sponte et voluntarie non vi metu vel aliqua coaccione seu sinistra informacione nec per errorem iuris uel facti sed ex certa sua sciencia et absque dolo et fraude, prout dicebat, fuit iudicialiter coram nobis confessus, quod ipse et quilibet rector seu plebanus dicte parrochialis ecclesie in Waltchirchen vigore incorporacionis dicto monasterio debite et legitime facte ad realem solucionem dicte pensionis annue teneretur dominis preposito et conuentui supradictis, dictamque pensionem quatuordecim librarum in statutis quatuor temporibus partim, vt premittitur, ex nunc in antea soluere firmiter promisit dominis preposito et conuentui supradictis aut eorum nuncio uel procuratori omni dilacione postposita et semota. Quod si in aliquo predictorum terminorum dictis dominis preposito et conuentui ac eorum nuncio uel procuratori predicta pensio trium librarum cum dimidia in quolibet termino quatuor temporum, vt premittitur, debita soluta non fuerit, promisit idem Chrisogonus, ex tunc in antea facere reficere soluere et integre resarcire omnia et singula expensas dampna et interesse, que ipsi aut eorum procuratores ac nuncii ac eorum aliquis ob defectum solucionis huius modi ac eius occasione quomodolibet facere ac incidere contigerint^b), et super hoc eorum ac alterius eorum stare iuramento absque alia probacione atque cognicione et judicis taxacione, pro quibus omnibus et singulis obseruandis et firmiter obtinendis et effectualiter adimplendis prefatus Chrisogonus plebanus obligauit coram nobis commissario supradicto dictis dominis preposito et conuentui et dicto domino Hermano procuratori eorum nomine legittime stipulanti omnia et singula bona sua ac dicte ecclesie sue mobilia et inmobilia tarn habita quam habenda, que omnia bona idem Chrisogonus nomine suo et dicte ecclesie sue se constituit jure precario pro predictis dominis preposito et conuentu et eorum nomine possidere vsque ad integram solucionem dicte pensionis annis singulis et terminis praescriptis persoluende ac obseruacionem plenariam omnium premissorum, prout superius est expressum, quodque idem domini prepositus et conuentus ac procuratores vel nuncii eorum uel eorum aliquis possint et debeant ex nunc in antea bona sic obligata, in quibuscunque et vbicumque consistant vel in futurum consistere poterunt, capere vendere alienare distrahere et pignori obligare auctoritate propria sine pena cuius cunque iudicis ecclesiastici vel secularis ac quouis preiudicio dictorum prepositi et conuentus et suorum, et apud (se) insolutum retinere pro iusto et conpetenti precio et se seruare omnino indempnes, renuncians idem Chrisogonus expresse simul et diuisim in omnibus hiis excepcioni^c) doli mali, accioni in factum, condicioni in debitis sine causa et ex iniusta causa, priuilegio fori competentis, omni tempore feriato et quadrimestri, omni appellacionis et prouocacionis remedio, omni consuetudini et statuto priuilegio clericatus noue et nouarum constitucionum iuris reuocandi dominii in integrum et cuiuslibet alterius beneficii restitutionis donacionis libelli et presentis instrumenti copie et specialiter beneficio illius legis C. de reuocandis donacionibus promissionibus obligacionibus et iuris dicenti promissionem et obligacionem errore factas non valere nec non iuris dicenti confessionem extra iudicium factam non valere, omni judicis officii imploracioni omnique alii accioni iuris et sancti canonici et ciuilis, per que contra presens instrumentum uel factum in eo qualitercunque descriptum obici uel opponi possit uel quomodolibet ueniri et specialiter jurisdicenti generalem renunciacionem non valere. Idem eciam Chrisogonus super omnibus et singulis in presenti jnstrumento contentis submisit se et dictam ecclesiam suam juris diccioni cohercioni et conpulsioni reuerendi patris et domini domini episcopi Patauiensis et commissariorum suorum atque nostris volens et consentiens expresse, quod dictus dominus episcopus seu eius commissarius atque nos ex nunc prout ex tunc et ex tunc prout ex nunc ad omnem requisicionem dictorum dominorum prepositi et conuentus ac eorum procuratoris seu nuncii tamquam pro re iudicata et confessa iudicialiter eo uocato vel non vocato possint et debeant ob defectum solucionis predicte in eum sentencias exconmunicacionis facere et promulgare, tociens quociens petiuerint, ac alias penas et sentencias, que eis placebunt et voluerint, contra ipsos petere et facere promulgare tam diu, quousque de omnibus et singulis premissis dictis dominis preposito et conuentui fuerit plene et integre satisfactum, quodque ad probacionem huiusmodi rei iudicate et confesse^d) iudicialiter, vt premittitur, sola probacio et produccio presentis jnstrumenti sufficiat, omnibus aliis probacionibus pretermissis. Nos igitur Nicolaus abbas et commissarius supradictus auctoritate dicti domini nostri domini Johannis episcopi Patauiensis et ipsius speciali mandato suis litteris nobis facto predictam obligacionem et omnia et singula in presenti jnstrumento contenta ad instantem peticionem dicti domini Chrisogoni plebani approbamus et ratificamus et ea ex certa sciencia rata habemus et grata ac in premissorum omnium fidem et testimonium dedimus predictis dominis preposito et conuentui presentes literas nostras nostris^e) ac dicti Chrisogoni sigillis impendentibus sigillatas, quas eciam ad maiorem cautelam fecimus per dominum Vlricum notarium publicum et scribam huius carte infrascriptum redigi in formam presentis publici instrumenti. Acta sunt hec in Gersten in domo habitacionis nostre anno domini millesimo trecentesimo octvagesimo quinto, indiccione octaua, decima die mensis Aprilis, hora nona vel quasi, pontificatus sanctissimi in Christo patris et domini nostri domini Vrbani diuina prouidencia pape VI. anno octauo, presentibus honorabilibus et discretis viris domino Chunrado priore et Heinrico cellerario et Johanne custode presbiteris professis dicti monasterii in Gersten et Hainrico Steger layco Patauiensis dyocesis testibus ad premissa vocatis pariter et rogatis.||
Et ego Vlricus Philippi de Ciagenfurt clericus Salzcburgensis dyocesis publicus apostolica et imperiali auctoritate notarius, quia omnibus et singulis premissis, dum sic, vt premittitur, anno mense die hora indiccione pontificatu et loco supradictis fierent et agerentur, vna cum prenominatis testibus presens interfui eaque sic fieri vidi et audiui, jdeo hoc presens publicum instrumentum manu mea scriptum signoque meo signatum vnacum appensione sigillorum venerabilis patris et domini domini Nicolay abbatis et commissarii ac ipsius domini Chrisogoni plebani in Waltchirchen predictorum in hanc publicam formam de mandato dicti domini Albertis redegi per dominum procuratorem et Chrisogonum predictos super hoc rogatus. et requisitus in f idem robur et testimonium omnium premissorum.

Source Fulltext: OÖUB 10 (Wien 1933) S. 318-322