Wir Albrecht von Gotes gnaden herczog ze Österreich ze Steyr ze Kernden vnd ze Krain, graf zu Tyrol etc. bechennen, daz wir haben angesehen die grossen geltschuld vnd auch ander merkleich geprechen, die dem gotshaus ze Gersten yeczunt anligend sint, vnd haben von sundern gnaden den erbern geistleichen vnsern lieben andechtigen abt Niclasen daselbs zu seinen lebtagen gefreyet vnd freyen auch mit disem gegenwürtigen brief vor aller gastung. Douon gepieten wir allen vnsern haubtleuten lantherren rittern vnd knechten phlegern burggrauen vnd andern vnsern amptleuten vnd vndertanen, daz si den egenanten abt Niclasen vnd sein gotshaus bey der obgenanten vnser freyhait beleiben lassen vnd si dawider nicht besweren noch yemand andern beswern lassen in dhainem weg. Besunderleich emphelhen wir gar ernstleich vnserm phleger ze Steyr, der yeczunt da ist oder künfticleich wirdt, daz er das egenant gotshaus ze Gersten bey diser vnserer gnad vesticleich halt vnd schirm von vnsern wegen, das ist genczleich vnser maynung. Mit vrchund dicz briefs geben ze Wienn an sand Thomas tag des heiligen zwelifboten nach Kristi gepurd dreuczehenhundert jar darnach in dem newn vnd achczigisten jare. Dominus dux in consilio.

Source Fulltext: OÖUB 10 (Wien 1933) S. 583-584