Hans Gorger ze Lewpolczstorf vergich für mich mein hausfraun vnd all mein erben mit dem offen prief vor allen lewten, den er furchumpt lesent oder hörent lesen, vmb die zway gueter, als hernach verschriben stent, von erst das lehen im dorf ze Lewpolczstorf, daz ich von meins genedigen herren abtt Niclas ze Garsten vnd seins gotshaws gehabt han, daruon ich gedretten han mit guetleichem meinem willen, daz ich noch mein hausfraw noch all mein erben gen demselben gut nymermer dagegen ze sprechen sollen haben weder mit rechten noch an recht vnd verczeihen vns des mit dem gegenwurtigen prief, daz ander gut genant am Gorgersperig auch ze Lewpolczstorf gelegen, darvmb ich meinem herren von Garsten versprochen han, ich soll dasselb gut selber besiczen vnd haws vnd hof darauf zymern vnd stiftleich legen nachs gotshaws rechten zwischen hinncz vnd sand Gorgentag, der schirist chunftig wirt, vnd sol auch darumb gut werden, daz ich an vrlaub noch an rechtschiedung vom gotshaws icht schaid, vermacht ich sein aber nicht besiczen, so sol ichs mit einem andern zu stiften aber nachs goczhaws rechten vnd sol darumb gut werden, daz ich auch gen demselben gut mein hausfraw noch all mein erben dargegen nymermer ze sprechen sollen haben weder mit recht noch an recht vnd verczeihen vns auch des mit dem gegenwürtigen prief. Auch sol ich obgenanter Hans von der obgeschriben zwayr güetl, darumb ich meins herren gnad von Garsten nicht het vnd in sein venknus gelegen darumb pin, nyemant dester veinter sol sein weder des gotshaws lawten vnd gut noch ander yemancs. Vnd ob ich daz, als vor verschriben stet an dem prief, auch stet hielt vnd yndert vberfür mit worten vnd mit werchen, des man mich mit zwain piderman macht beweisen, so pin ich obgenanter Hans leibs vnd guts an aller gnad, in welhem gericht daz ist, veruallen vnd ein vbersaiter man mit dem gegenwurtigen prief. Darvber gib ich obgenanter Hans den prief fur mich mein hausfraun vnd all mein erben zu einem waren vrchund, der versigelt mit der erbern ist Wolfharts Inbrugger dizeit phleger ze Steyr vnd Vinczenczen des Amersperger dizeit phleger ze Losenstain paider anhangunden insigeln, die si daran gelegt habent durch meiner meiner hausfraun vnd all meiner erben fleizziger gepet willen in vnd irn paiden erben an schaden, darvnder ich mich obgenanter Hans mein hausfraw vnd all mein erben vnder ir insigel verpinten genczleich mit vnsern treun an aides stat, alles daz stet haben, daz oben geschriben stet an dem prief, wann wir selber aigens insigels nicht heten. Der prief ist geben am Vreitag vor sand Veycstag, do man zalt von Kristes gepurt drewczehen hundert iar vnd darnach in dem drewvndnewnczkgisten jare.

Source Fulltext: OÖUB 11 (Wien 1983) S. 187-188