Wir Nikla von Gots gnaden abtt ze Gärsten vnd mitsambt vns vnser conuent daselbs bekennen mit dem offenn brief vor allen läwten gegenwürtigen vnd künftigen, als wier yczund stewr begert vnd auch geuodert haben von den läwten, der gütter gestifft vnd gewydempt sind zu dem gotsdienst czu sand Gilgen vnd dem gotshaws der pharrkirchen ze Steyr, das wier durich füdrung vnd merung desselben gotsdienstes vnd auch durich vleissiger pett willen der ersamen weysen des Richter des Rats vnd Burger daselbs ze Steyr wier vnd vnser nachkomen nu fürbas von denselben gütern vnd holden, die darauf siczend vnd jnnehabent, vnd von iern nachkomen nymermer kain stewr an sew vodern noch begern sullen, weder babststewr byschoffstewr noch hertzogenstewr noch chain ander new anvodrung oder stewr, wie so die genant würd, weder vns noch einem pharrer ze Steyr vnsers conuents, wer der yczund oder in künftigen zeiten wär oder würd, nymermer geraihen noch geben sullen angeuär awsgenomen irs gesaczten diensts vnd etleicher rechten, damit dieselben güter zu dem genanten gotsdienst gestifft vnd gewydempt sind, als die stifftbrieff weysent, die darumb geben sind. Mit vrkund des briefs besigelten mit vnserm abtt Nyklas vnd vnsers conuents paider anhangunden jnsigeln, geben an sand Luceyn tag nach Kristi gepurd drewczehenhundert jar darnach in dem fümfvndnawnczigisten jare.

Source Fulltext: OÖUB 11 (Wien 1983) S. 452-453