Ich Fridreich von hausekk ich vergich offenleich an disem brief vnd tuen auch chund allen den, di disen brief ansehent oder ho^ernt lesen, daz ich mit wol bedachtem mu^et vnd durch gewarhait meiner sel willen vnd meiner hausfrawn sel willen frawen elspeten han gelobt mit meinen trewen meinem herren abbt Otten von Ma^ennse vnd seiner samnung, daz ich den zehent dacz hausekk, dez ich zway tail von dem pistum ze Regenspurg vnd daz drittail von dem gotshaws ze Ma^ennse ze lehen han, dazselb drittail dez zehents, er sey verlihen oder vnuerlihen, den sol ich nyndert verchummern mit nichte also, wann ich nicht enpin, so daz derselb zehent daz vorgenant gotshaws anersterb an allen chrieg, daz auch dicz gescha^efft dem Gotshaws ze Ma^ennse sta^et werd wehalten ze seinem frum vnd ze meiner sel sa^elichait, gib ich daru^eber ze einem vrchund disen brief mit meinem insigel. Diser brief ist geben dacz dem haws, do von Christi gepurd sind gewesen Tausend Jar vnd zway hundert Jar vnd fumf vnd Newnczk Jar an der aynlef tawsent maid tag.

Source Fulltext: OÖUB 4 (Wien 1867) Nr. 253, S. 229-230