Ich Turnchart der pu^ebinger, mein hawsfraw vnd mein erben veriehen vnd tuen chunt offenbar an dem brief allen den, die in ansehent oder ho^ernt, daz wir vns mit gu^etleichem willen vnd mit wol bedachtem muet vnser herren von Ma^ennse hof ze Gä^enakcher haben verzigen also mit der beschaiden, daz wir fu^erbaz ewichleichen chain ansprach darnach nymmer mer sullen gehaben, wir haben auch verhaissen bey vnserm ayde vnd trewen, waz vnser herren von Ma^ennse lawt vnd gu^et habent, daz wir damit auch nichts nicht chlain noch (vil) ze schaffen sullen haben, alz vor geschriben stet vnd der brief sagt, bey der Taiding sind gewesen her Charl von Rayn, her Ott Richter ze Lanndaw, her hainreich Chastner ze Lanndaw, Vlreich der stain, Gerhart der Amman von vsterling, ha^ertl von fra^emaring vnd philipp sein pruder vnd ander pidere lawt genueg. vnd daz in dazselb also sta^et, gancz vnd vnzebrochen beleib, dez geben wir In disen brief mit herr Otten dez tages gewaltigs richter ze lanndaw jnsigel jm vnd seinen erben an schaden nw^er ze einer gedachtnu^ess diser Taiding vns ze lieb, vnd verpinden wir vns mit vnserm starchem aid vnd trewen vnder daz vor genant insigel, wann wir aigen insigel nicht haben. Der brief ist geben, do man zalt von Christi gepurd Tawsent Jar, darnach drewhundert Jar, darnach in dem fumf vnd dreizzigisten Jar an sand Marteins abent.

Source Fulltext: OÖUB 6 (Wien 1972) S. 187, Nr. 181