Ich Fridreich von Ma^emling vergich offenbar an disem brief allen den, die in sehent oder ho^ernt lesen, daz mir der Ehrsam herr Abbt Christan ze Mannse lazzen hat den hof ze Aincholfing mit der weschaiden, daz jm vnd dem gotshaws aller der dienst, der von dem vorgenanten hof gehört vnd auch mal nachtsell (sic, mendose), wie ez genannt sey, daz gewondleich vnd sitichleich her ist komen, von mir wideruarn sol. ich sol auch zu^e der Rechten Stiftzeit, ich hab muet bey jm ze beleiben oder nicht, alz ein ander seiner holden in sein Stift chommen alz mu^egleich vnd pilleich ist. wa^er aber daz, dez got nicht geb, daz mir von plyzes oder von schawr oder von anderm sichtigem Lanczpresten schad widergieng, der sol beschawt werden von seinem amptman oder von seinem Probst, vnd nach desselben vnd ander pider vmbsa^eczen rat sol er mich bedenchen. widerfu^er auch nicht (ich?) meinem vor genanten herren vnd dem Gotshaws sein vadrung zu^e der rechten zeit, als pilleich ist, waz er dez schaden na^em mit welcherlay sachen daz wa^er, der sol jm vnberecht abgetan werden von meiner hab. wann er auch oder wer dez Gotshaws abbt oder pfleger ist, mich auf dem hof verchern wolt, dez sol ich jm mit nichte wider sein noch jn daran hindern noch auch daz Gotshaws noch sein law^et dez lazzen engelten an allen den trewen, di ich vor hintz jn gehabt han. vnd daz daz meinem herren vnd dem Gotshaws stat weleib, daz gib ich in disen brief versigelten mit meinem vnd dez erbern herren hern wernhartz dez Grans Anhangunden insigeln. der brief ist geben, do man zalt von christi gepurd drewczehen hundert Jar, darnach in dem acht vnd dreizzigisten Jar an des heiligen herren abbt Chunrats tag.

Source Fulltext: OÖUB 6 (Wien 1872) Nr. 253, S. 258f.