Ich Wolfhart von Sewalhen vergich offenbar an dem brief allen den, di in sehent oder horent lesen, daz ich von meinem genadigen herren hern Christan dem Ersamen abbt von Ma^ennsee han gewarfen daz lawgeding auf den zwain gutlein ze Chemnaten, daz main hawsfraw diemut, der got genad, hat gehabt mit der weschaiden, daz ich di jnne schol haben, di weil ich leb mit den nüezen, als ich se jnne han gehabt bey ir lebentigen zeiten vnd di davon geho^ernt also, daz dem Gotshaws davon auch wideruar, daz ich durch recht haben sol. ez ist auch ze wissen, daz daz gehandelt ist mit aller meiner frewnt vnd erben willen vnd wart, vnd wann ich nymer pin, so svllen di vorgenanten gu^etel ze Chemnaten an alle widerred vnd Chrieg aller meiner erben vnd frewnt ledichleich dez e genanten Gotshaws vnd meiner herren ze Ma^ennsee sein, vnd zw einem vrchund der warhait, seind ich wolfhart nicht aigens insigels han, gib ich meinem gena^edigen herren vnd dem gotshaws ze Ma^ennsee disen brief, daran ich vnd mein erben vns verpinden vnder dez Ersamen hern Rudolfs dez Hohenuelder jnsigel jm an schaden. Datum Anno domini millesimo Trecentesimo Quadragesimo in die Sancte Trinitatis.

Source Fulltext: OÖUB 6 (Wien 1872) Nr. 330, S. 335f.