Albertus dei gratia Patauiensis Episcopus Omnibus presentia visuris seu audituris salutem et notitiam subscriptorum. Cum plantare sacram Religionem minus sufficiat, nisi etiam plantata foueatur, Sic apte profecto foueri prospicitur, si in casibus, ubi Ruina minatur, ante lapsum conpletum congruis auxilijs subleuetur. Sane igitur aduertentes, quod Monasterium Sanctimonialium in Traunchirichen Ordinis Sancti Benedicti nostre dyocesis ignis voragine in Edificijs suis intrinsecis sit totaliter desolatum ac per gwerrarum disturbia, que in confinibus suis pro tempore fortius invaluerunt, adeo in facultatibus suis deuastatum, quod, nisi celeri succurratur sibi remedio, addicere non valeat, ut resurgat, Attendentes nichilominus ex eo, quod plebani seu Rectores Parrochialis Ecclesie ibidem se a Residentia personali frequenter subtrahunt tantum presbiteris conducticijs illic derelictis, dictis Monialibus tam in officio diuino quam alijs ministerijs, ad que Rector predictus ipsis obligatur, varia incomoda et dampnosa nonnumquam obstacula procreari, Nos pro defectibus huiusmodi conmodius reformandis Ecclesiam Parrochialem in Traunchirichen predictam cum omnibus iuribus et pertinentijs suis, in qua jus Patronatus ad ipsas pertinere dinoscitur, eidem Monasterio seu Conuentui de consilio et consensu nostri Capituli pleno jure donauimus, apropriauimus, vniuimus et incorporauimus ipsis et eorum Mense perpetuo annectendo, vt uidelicet, quandocunque plebanum sev Rectorem in presenti ibidem existentem cedere uel decedere contigerit, Ipse Moniales aliquam personam ydoneam pro perpetuo Vicario ad eandem Ecclesiam nobis uel nostris Successoribus presentare debeant, Qui institucionem Canonicam ac Curam animarum plebis subiecte nec non administrationem Spiritualium et Temporalium ad ipsam pertinentium de manibus nostris seu eorundem successorum nostrorum recipere teneatur, Cui nichilominus Tantum de prouentibus ipsius Ecclesie debebunt assignare, quod Cultum diuinum cum Capellanis et ministris consuetis prius inibi habitum necnon cum hospitalitate debita ac omnibus et singulis oneribus papalibus, Metropoliticis, Dyocesanis seu Episcopalibus ac quibuscunque alijs ibidem hactenus obseruari consuetis conmode et absque diminutione qualibet valeat supportare, pro quibus integraliter adimplendis non solum Vicarium huiusmodi sed et Totum Monasterium predictum cum eodem volumus esse obligatum. De Residuo uero statuimus et precipimus, vt cuilibet domine ultra peccuniam hactenus pro vestibus singulis annis dari consuetam media libra denariorum wiennensium annuatim ad uestimenta sua melioranda superaddatur. Quod vero superfuerit, ad alios vsus Monasterij magis necessarios iuxta presidentium prouidentiam applicetur. Et ut predicta omnia et singula firma et Rata ac jnuiolata perpetuo perseuerent, Presentes litteras supra eis confici mandauimus nostri et Capituli nostri predicti sigillorum appensione Roboratas. Actum et datum Patauie Anno Dominj Millesimo Trecentesimo Tricesimo secundo jn Crastino Beati Gregorij pape.

Source Fulltext: OÖUB 6 (Wien 1972) S. 55f., Nr. 47