Wir Margret von Gotes genaden abtessinn ze Traunchirichen vnd der conuent des selben gotzhauzz wir veriehen vnd tuen chunt offenwar mit disem prief allen den, di in sehent oder lesent oder ho^erent lesen, daz fu^er vns ist cho^emen Go^etfrid von Altmening, vnd mit wolbedachtem muet vnd mit aller seiner erben willen vnd wart vnd auch nach rat seiner pesten frevnt vnd erberer lantleut hat Reichern dem Mu^elwanger recht vnd redleich ze chauffen gegeben im vnd allen seinen erben den hof, den er hat gehabt ze Altma^ening mit allen den nu^etzen, di dar zue geho^erent ze holtz vnd ze veld, versuecht vnd vnuersuecht, da von man vns jerleich dient an vnserer Vrawen tag ze der dienst zeit fu^enf vnd dreizzig newer wienner pfenning, vnd ze der selben zeit hat sich der ee genant Reicher der Mulwanger mit dem ee genanten Gotfriden von Altma^ening liebleich vnd frevntleich bericht vmb den selben vorgeschribenn hof ze Altmening, daz er im weder (sic) gelten noch wider geben nicht schol, vnd haben den selben hof verlihen ze rechtem eribrecht dem vorgeschriben Reichern dem Mulwanger vnd allen seinen erben also mit der beschaiden, daz si vns allev iar da von schu^ellen dienen an vnser vrawen tag ze der dienst zeit fu^enf vnd dreizzig newer wienner pfenning, vnd ob si den selben dienst versezzen, so schol man sev pfenten immer nach viertzehen tegen vmb ein wandel als lantz recht ist. Dar vber geben wir disen prief zu einer pezzern sicherhait diser gegenwurtigen red vnd zu einem vrchunt der worhait versigelten mit vnsern payden anhangunden jnsigeln. Der brief ist geben, do man zalt von Christi gepurd dreutzehenhundert iar, dor nach in dem ainen vnd fu^enftzigisten jar an sand Philipps tag.

Source Fulltext: OÖUB 7 (Wien 1876) S. 244, Nr. 239