Wir Margret von Gotes genaden abptessinn tze Trawnchirchen verjechen, daz Ott von Steten in sein nutz und in sein gewer pracht hat im und seiner hawsvrawen und ier paider erben in rechter satzes gewer de hueb tze Obernsteten, da man uns jerleych von dient tzwelyf metzen habern und sechs metzen chorns eyn sweyn fuer funftzig phfenning chorn fueren und weyn werichart wu^erchen eyn lers vas frieren hintz dem Stadel und tzway huener stewren nach gnaden. Wer aber daz, daz yemant herfuer chem der pezzer erb wolt seyn tzu der vorgenanten hueb tze Obernsteten, der schol ym geben czwaynczk phfunt wienner phfenning, er schol auch uns alle den dienst da von dyenen alz vor geschriben stet und unser hueb stiftleych legen. Wer awer daz der obgenant dienst verczogen wuert czden rechten tegen, so sint se wandels vervallen nach lancz recht und haben vollen gewalt cze phfenden mit ier guetleych willen an alle widerred. Und daz in dew red alse fu^erbas stet und unczebrochen peleybe, daruber geben wier in disen gegenbuertigen prief czu eynem warn u^erchund mit unserm anhangunden insigel. Der prief ist keben dacz Trawnchirchen an goczleychnams tag, da von Christi gepu^ert ergangen warn drewczechen hundert jar darnach in dem ainen und sechczkisten jar.

Source Fulltext: OÖUB 8 (Wien 1883) S. 21f., Nr. 24