Ferdinanndt. Erberer andachtiger! Wir haben verschiner zeit auf unnser getreuen lieben N. richter unnd rat unnser stat Baden unnderthenig furbringen¹ von wegen, das paldt nach absterben N. weillendt des vorgewesen prior des augenstinercloster daselbs zu Paden unversehen unnd verlassen gestanndten, dir unnsern willen genedigelichen zu erkhennen geben², das wir nit ungenaigt, berurts closters einkhomen zu ermelter burgerschafft spitall zu Baden zu wennden mit der conndition, das der gotzdiennst von solchem einkhomen verricht wurde unnd den ubertaill zu aufennthalt der hausarmen verderben (sic!) leut, so daselbst sein unnd von anndern taglichen dahin khomen, volgen zu lassen, unnd dir daneben bevolhen, das du unns darauf deinen lauttern furderlichen bericht thuen sollst. Dann wo nach gestallt der yetzigen leuff nit zu erachten, das solch closter mit ordennsleutten nit solle von khurtz widerumben ersetzt werden mugen, das unnser maynung, verordnung zu thun, dardurch solch einkhomen zu ainem guetten werch wie obangetzaigt gewenndet wurde, alles merers innhalts desselben unnsers an dich ausganngen bevelchs. So ist unns aber daruber bisheer solcher begerten bericht nit erfolgt, sonnder die gedachten von Badn unns an unnsern khunigelichen hoff verrer furbracht, wie etlicher jar heer der gotzdiennst unverricht unnd die verkhundtung des gotlichen worts unnderlassen beliben, das auch durch die unwirdlichait des priors, so du daselbst eingesetzt, in khurtzer zeit etliche stuckh unnd gueter verkhaufft unnd die weingardten in abpau bracht werden sollen³. Demnach emphelhen wir dier nochmals unnd wellen, das du ermellt closter zu Baden in dreyen monnaten, die nechsten nach dato ditz unnsers bevelchs, mit ordennspersonnen notdurfftigelich versehen unnd widerumben besetzen unnd bey denselben ordennsleuten daran seyest, damit der gotzdiennst, darauf die fundation beschechen, verricht unnd das gotlich wordt, wie sich geburt, verkhundt werde. Dann wir wellen dir genadiger maynung verrer nit verhallten, wo die ersetzung mit ordenspersonnen in bemeltem closter abangetzaigte mossen nit beschechen, das unns solches lennger zuezesehen noch zuegestatten khains wegs gemaint sein, sonnder wir alsdann nit umbgeen wurden, in annder weeg fursehung zu thun, dardurch das closter einkhomen auf unnderhaltung der armen notdurfftigen leut gewenndt unnd der gestifft gottesdiennst volbracht werde. Geben in unser stat Wienn am xxx. tag Januarii anno etc. im 40^{ten a}.

Source Fulltext: MAURER, Augustiner-Eremiten Baden (=FRA II/89, Wien 1998) S. 310-312.