Wir Matthias, von Gottes gnaden erwöhlter römischer kaiser, zu allen zeiten mehrer deß reichs, in Germanien, zu Hungern, Böheimb, Dalmatien, Croatien und Sclauonien etc. könig, erczherczog zu Osterreich, herczog zu Burgundi, zu Brabant, zu Steyr, zu Kärntn, zu Crain, zu Luczemburg, zu Wiertemberg, Ober- und Niderschlesien, fürst zu Schwaben, marggrave deß heyligen römischen reichs, zu Burgaw, zu Mährern, Ober- und Niderlaußnicz, gefürster grave zu Habspurg, zu Tyrol, zu Pfiert, zu Kiburg und zu Görcz etc., landtgrave in Elsäß, herr auff der Windischen March, zu Portenaw und zu Salins etc. bekhennen für unß unnd unsere erben offentlich mit dem brieff, daß unß unser getrewen lieben n. richter, rath und die burger gemainglich unser statt Zwetel diemüetigelichen anrueffen und bitten haben lassen, daß wir ihnen all und jedlich ihr genadt, freyhait, recht, privilegia, alt herkhomen und guette gewonhait, so ihnen von weylandt unsern vorfordern fürsten von Osterreich gegeben, die ihnen auch jüngstlich von weylandt dem allerdurchleuchtigisten großmächtigisten fürsten herrn Rudolffo dem andern, römischen khaiser etc., unserm freundlichen, geliebten herrn bruedern hochlöblich und seeligister gedechtnus alß regierenden erbherrn und landsfürsten in Österreich, inhalt deß unß fürgebrachten besigleten original brieffs, dessen datum steht Wienn den zwen und zwainczigisten tag deß monats may nach Christi unsers lieben herrn und seeligmachers geburt funffzehenhundertzwayundachtzigisten jahrs, mit gnaden confirmirt und bestät worden wären, widerumben zu verneuern, zu confirmirn und zu bestätten gnedigclich geruheten. Deß haben wir angesehen der bemelten von Zwetel vleissige bette, auch die undterthenigen getrewen unnd willigen dienst, so sy bemelten unsern vorfordern fürsten und erczherczogen zu Osterreich gethan und erzaigt haben und unß hinfüran auch wol thuen mögen und sollen, und ihnen, ihren erben und nachkhomen dardurch und auß sondern gnaden umb ihres nucz und auffnemens willen all und jedliche vorgemelte brieff, gnadt, freyhait, recht und guet gewonhait, sovil sy der in gebrauch sein, und darzue in den freyhaiten, darumben sy in ansprach und rechtfertigung stehen möchten, unvergriffen und ohn schaden, inmassen, alß ob die von wort zu worten hierin geschriben wären, alß jeczt regierender erbherr und landtsfürst in Osterreich auch gnedigclichen vernewert, confirmirt und bestätt, vernewern, confirmirn und bestätten ihnen die auch wissentlich in crafft diß briefs, mainen, seczen und wöllen, daß die in allen iren puncten, articln und begreiffungen gänczlich bey crefften bleiben gehalten und von niemands darwider gethan oder gehandlet werden soll in khain weiß. Darauff gebieten wir den edlen unsern lieben getrewen n. allen unsern hauptleuthen, landtmarschalchen, graven, freyen herrn, rittern, khnechten, viczdomen, pflegern, verwesern, landtrichtgern, burggraven, burgermaistern, richtern, räthen, burgern, gemainden und sonst allen andern unsern ampleüthen, underthanen und getrewen ernstlich und wöllen, daß sy die vorgenanten richter, rath und burger gemainglich zu Zwetl, ihr erben und nachkhomen, bey den vorgemelten ihren brieffen, gnaden, freyhaiten, rechten und alten gueten gewonhaiten auch diser unser confirmation und bestättigung nit verhindtern noch irren, sonder sy der geruhigclich gebrauchen, geniessen und genczlich dabey bleiben lassen und darwider nit thuen noch deß jemandts andern zu thuen gestatten, alß lieb ihnen allen und ihr jedem seye, unser schwäre ungnad zu vermeiden. Daß mainen wir ernstlich. Mit urkhundt diß brieffs besiglet mit unserm kaiserlichen anhangenden insigl. Geben in unser statt Wienn den neünundzwainczigisten monatstag aprilis nach Christi unsers lieben herrn und seligmachers geburt im sechzehenhundert und dreyzehenden, unserer reiche deß römischen im ersten, deß hungerischen im fünfften und deß böheimischen im andern jahren. Matthias

Source Fulltext: Transkription und Regest: Mag. Klaus Birngruber