Ich Michll Pünczer unndt ich Catharina sein eheliche hausfrau bekhennen hiemit fuer unnß, alle unsere erben unndt nachkhumen offentlich undt thun kundt menigkhlich, daß wier inn auffrichdigen redlichen kauff, unndt wie kaufsrecht ist, hingeben haben unser haarstuben sambt einem gardten an der lederzeill zu Zwetl, davon man järlich dem edlen unndt gestrengen herrn Thobiaß Pachmair auff Moydrantz allß völligem inhaber undt aigenthumber deß berüerden guetts Moydrantz dient Michaeli vierzehen kreutzer, dem edlen unndt vesten herrn Petrum Purckhardum, notarium publicum unndt stattschreiber der kays. statt Zwettll, umb ain summa gelltß, der wier allso baar zu unsern handen eingenomen undt inn unsern nutzen gekerdt haben, daran wier dann gantz wollbeniegt, auch unnß undt gemelde unsere erben künfftigkhlich wollbeniegen lassen sollen undt wöllen, sagen hierauff obbemelden herrn Purkhhartum hiemit inn crafft diß briefs gantz frey, quitt, ledig unndt loß, also daß er mergemelder herr Petter Purckhartus jetzo unndt hinfieran solichen gartten mag innenhaben, den nutzen undt geniessen sambt der haarstuben, mit pauen, verkhauffen, versetzen, verschaffen, machen undt geben, wem undt wie ime verlust, allß mit anderm seinen aigenhafften gueth, ohne unnß, unsere erben, auch sunsten ohnn menigkhlichs vonn unsertweg ierung unndt widersprechen, doch unvergriffen (obberüerdes grundtiensts). Ich obgemelder verkhauffer sambt meiner hausfrauen unndt erbenn sein auch merberüerdeß herrn kauffers soliches kaufrechts unndt garten halber seine rechde gwer, schermb unndt füerstandt wier all künfftig ansprüch, wie dan solch unndt dergleichen kaufrecht unndt gwerschafft diß lant Österreich undter der Ennß sidt, brauch, gewonheit unndt auch recht ist; gieng aber hierinen offtgedachtem herrn kauffer ichdes ab, oder daß ihme derhalben ainigerley ansprach darumben auferstundt, von wem daß sein wüerdte, so sollen unndt wöllen wier ime mit recht, in alwäg unndt jederzeit veranttworden, vertreden undt allerdings hierinen gantz schatloß halden, alleß bei verbindung deß allgemainen lantschadenpuntß diß lant Österreich undter der Ennß, getreulich unndt ohne geverdte. Deß zu warem urkhundt haben wier obbemelde lan[t[leuth mit hochem vleiß erbetten denn edlen unndt gestrengen herrn Thobiae Pachmair vonn Undterthumbritz auff Moydrantz allß völligen aigenthumber deß obberüerden guetß Moydrantz, daß er vonn lehenschafft wegen dißen kaufbrief mit seinem angebornen adelichen petschafft verferdigt hatt (doch ime herrn Pachmair, seinen erben unndt färdigung gentzlich ohne allen nacht[ei]l unndt schaden). Beschehen zu Moydrantz, den 23. Februarii im sechzehenhundert unndt im fünffunndtzwainzigisten jhar.

Source Fulltext: Transkription und Regest: Mag. Klaus Birngruber