Nos Stephanus de Meissav, marscalcus Austrie, notum facimus vniuersis, tam presentibus quam futuris, hanc litteram inspecturis, quod cum iam dudum ante annos quindecim Reimboto et Meinhardus fratres de Sulze, possessionem suam ibidem indiuisam iure hereditario possedissent, contigit ut mortuo Reimbotone heredes sui, scilicet tres filie, quas de prima vxore sua superstites jdem Reimboto reliquerat, quarum prima et senior Gedrudis, secunda Perhta, tercia Gisila vocabatur, de consilio propinquorum suorum, cum Meinhardo patrvo suo iam predictas possessiones diuiderent equaliter, iusticia sic dictante. Postmodum prelibatus Meinhardus, cum liberos non haberet, volens (?deum) dominum bonorum suorum constituere successorem, de consilio amicorum suorum, accedente etiam consensu et beniuola voluntate cognatarum suarum predictarum partem possessionum suarum in Sulce ecclesie sancti Lamperti in Altenburch donauit et libere legauit, et super altare ibidem manu propria resignauit, ita tamen, ut ad tempora vite sue prenominata ecclesia necessaria uictus et vestitus sibi debeat ministrare. Hiis ita gestis prelibati Reimbotonis tres filie superius nominate de consilio amicorum suorum, omnium possessionem suarum diuisionem equalem inter se facere decernentes, seniori sorori domine Gedrudi, partem illam in Sulze pro certa hereditatis relique portione assignantes, quam ipsa tamquam sufficientem acceptans, et pro tempore uite sue pacifice possidens et quiete, absque liberis de medio est sublata. Qua defuncta iuniores ipsius Gedrudis sorores, domina Perhta videlicet atque Gisla, in ipsius hereditaria possessione propinquitatis iure, sicut exposcebat iusticia, succedentes et per maritos suos, quorum vnus maritus scilicet domine Perhte Rudigerus de Purchstalle, alter maritus videlicet domine Gisle Fridericus Reihzinger de Stegen nuncupatur, de eadem possessione se intromittentes, et suis usibus applicantes, nec non et eandem possessionem sine contradictione et impeticione qualibet possidentes, tandem conuenerunt in hoc, et de consilio maritorum suorum et aliorum amicorum suorum concorditer deliberarunt, quod eandem possessionem ecclesie sancti Lamperti in Altenburch pro duodecim talentis denariorum vendiderunt, et presentibus maritis suis, qui vendicionem eandem fideliter consulentes ratam habuerunt, ad manus venerabilis domini Chunradi abbatis eiusdem ecclesie, predicti predii ius proprietarium resignantes, promiserunt fide data tam ipse quam et mariti earum, quod defensionem debitam et condignam secundum omnem iusticiam, quam deberent pro suis heredibus, quos tenellos tunc duos viuos habebant, Engelmudim et Irnfridum videlicet, contra omnem impetentem prestareuelint eidem monasterio de predio prenotato. Quia vero nos ecclesiam Altenburgensem in suis iuribus defensare et indempnem volumus conseruare, vt huiusmodi possessionum emptio et vendicio rata inposterum maneat atque firma, et calumpniose iniuriantibus silencium inponamus, in testimonium premissorum presentes litteras conscribi fecimus et easdem cenobio pretaxato dedimus sigilli nostri robore communitas. Testes huius rei sunt: dominus Wolframmus plebanus de Stegen, dominus Paulus plebanus de Rorenpach, dominus Vlricus plebanus de Molt, dominus Poppo de Pevgen, dominus Heinricus de Pach, Heinricus de Wilperch, Heinricus et Vlricus fratres de Dahpach, Prehtlo de Chruege, Gotscalcus de Vronhoven, Chunradus de Sancta Maria, Fridericus de Widen et Otto filius suus, Heinricus de Walkerstein et Albero filius suus, Chunradus Karinthianvs de Altenburch, et Dietlo ibidem, VIricus de Fukkla, et alij quam plures. Acta sunt hec anno domini MCCLXXXIIII. In die sancti Cholomannj.

Source Fulltext: BURGER, Urkunden Altenburg (=FRA II/21, 1865) S. 33-34