Vniuersis Christi fidelibus, ad quos littere presentes peruenerint, nos miseratione diuina Thomas Acherarum, Leo Calamonensis, Romanus Crohensis, Valdebrunus Auellonensis, Egidius Durtiberensis, Maurus Ameliensis, Acursius Pesauriensis, Perronus Larinensis, Michael Antibarensis et Gregorius Arbensis, archiepiscopi et episcopi, salutem in domino sempiternam. Licet is, de cuius munere venit, vt sibi a suis fidelibus digne ac laudabiliter seruiatur, de habundancia pietatis sue merita supplicum excedens vota bene seruientibus multo maiora tribuat, quam valeant promereri, desiderantes tamen domimo reddere populum acceptabilem, fideles Christi ad complacendum ej quasi quibusdam allectiuis, muneribus videlicet et remissionibus, inuitamus, vt exinde reddantur diuine gracie apciores. Cvpientes igitur, vt abbacia Altenburgensis Patauiensis dyocesis congruis honoribus frequentetur, omnibus vere penitentibus et confessis, qui ad predictam abbaciam in festis subscriptis, videlicet natiuitatis domini, resurreccionis, ascensionis et penthecostes, et in singulis festis beate Marie virginis, et in festo trinitatis, beati Johannis baptiste et euangeliste, apostolorum Petri et Pauli et omnium apostolorum, Laurentij et Thome martirum, Nicolaj et Cadmundi confessorum, nec non et in festis sanctarum virginum Katerine, Margarete et Marie Magdalene, et maxime in festo beati Lamberti, in cuius honore predicta abbacia est fundata, ac eciam in festo dedicacionis eiusdem, deuotionis causa accesserint aut de bonis sibi a deo collatis ad fabricam vel ad sustentationem luminarium aliquid contulerint, seu eciam in extremis laborantes de suis legaverint vel quoquo modo dederint, nec non et qui pro animabus requiescentibus in dicta abbacia et pro animabus omnium fidelium defunctorum, quocienscumque et quandocumque orationem dominicam cum salutatione virginis supradicte pia mente dixerint, nos de omnipotentis dei misericordia et sue matris piissime nec non apostolorum Petri et Pauli et omnium sanctorum auctoritate confisi, singuli singulas dierum quadragenas de iniunctis sibi penitentijs, dummodo dyocesanus eiusdem hanc nostram indulgenciam ratam habuerit, misericorditer in domino relaxamus. In cuius rei testimonium sigilla nostra duximus apponenda. Data Rome, anno dominj millesimo ducentesimo octuagesimo septimo, pontificatus dominj Honorij pape quarti anno secundo.

Source Fulltext: BURGER, Urkunden Altenburg (=FRA II/21, 1865) S. 37-38