Ne gesta hominum mutabilia per transcursum temporis defluentis in obliuionem decidant et errorem, proborum ea virorum testimoniis et litterarum apicibus conuenit perhennari. Hinc est, quod nos Leutoldus de Chunringe, pincerna Austrie, tenore presencium protestamur et constare volumus vniuersis, quod cum venerabilis dominus Walchunus abbas et conuentus honorabilium fratrum in Altenburch nomine ecclesie sue vnius talenti redditus in villa Strenich situati aput Alrammum de Jevhinge, dictum Hertweichstainer, et vxorem suam dominam Gedrudim de Streitwesen, cognatam nostram, de bona voluntate filie sue Marie, pro vndecim talentis denariorum Wiennensium et sexaginta denariis comparassent, Heinricus dictus Waser, gener Alrammj militis prenotati, suique heredes, videlicet Margareta, Alrammus, Heinricus et Chunegundis, quia assensum eorum primitus non dederant ad hoc forum, acceptis duobus talentis, a nobis vno et ab Alrammo auo ipsorum secundo, renunciauerunt omni iuri, quod eisdem competere videbatur in possessionibus memoratis. In cuius rei testimonium pariter et cautelam prenominate ecclesie sancti Lamperti in Altenburch, cum hec nostro sint consilio terminata, presentes damus litteras, sigilli nostri robore communitas. Huius rei testes sunt: dominus Vlricus plebanus de Tyrenstain, dominus Wolframmus plebanus de Stregen, dominus Eberhardus sacerdos, socius aput sanctum Mychahelem, dominus Fridericus de Mychelsteten, dominus Rugerus de Zaucharn, dominus Heinricus de Svellenpach, dominus Perchtoldus de Akstain, dominus Otto de Pergarn, dominus Vlricus Mertzo de Chotzendorf, dominus Otto Grecus de Vreitzlarn, dominus Heinricus de Pach, Heinricus Huglinger, Arnoldus Huglinger, Ortwinus dictus Geiger, Dittricus Grueber et Vlricus de Wachovia, Engelbertus judex in Horn, Vlricus Grueber, Otto frater suus, Heinricus Wiltperger, Heinricus Dachpech, Gotschalcus de Fronhoven, Chunradus de Sancta Maria, Hugo de Molt, Chunradus, Fridericus ibidem, Hainricus notarius, Siefridus scriptor de Tyrenstain, Hainricus Hereticus de Jevhinge, judex noster ibidem, Ditmarus de Altenburch, Vlricus Wienner, Chunradus Sultzer, et alij quam plures. Datum et actum in Tyrenstain, anno dominj MCC. nonagesimo, octauo Kalendas Octobris.

Source Fulltext: BURGER, Urkunden Altenburg (=FRA II/21, 1865) S. 57-58