Wier Stepphan von Meyssowe, der marshalich von Oesterich, tun chunt allen den, die nu lembtich sint oder her nach chumftich sint, die den gegenbuertigen prief an sehent daz der erber herre abt Walehu^on von Altenbu^orch vnt sein samnunge, gechovffet habent ier gotshovss hintz Altenbu^orch vmbe fumphtzige phunt phenninge datz Friderichen dem Vuchs vnt ze seiner hovsfrovn vron Dyemuten daz hovsse datz Ekkenstain mit dem aigen, daz der zu^e geho^ert, daz si pedev ze derselben ceitte in gver vnt in gualt heten vnt daz ier rehtez aigen was vnt da von mahten vreileich daz gegeben svem si wolten, vnt tun ouch ze wizzen allen den, diê disen prief horent lesen, daz der pharer Wolfram von Stregen in demselben iar ovch gechovffet hat hintz Stregen seinem gotshovsse, datz demselben Friderichen vnt ze vron Dyemuten seiner housfrovn, svaz si aigens heten pêi der chyrchen datz Stregen an ekkern vnt an povmkarten, vmbe drevtzchen phunt, vnt du die pede chovffe ergingen, du chom der vor genant herre abt Walchu^on vnt sein sanmunge von Altenbu^orch mit sampt dem pharrer von Stregen fuer vns ainthalbe, dar vmbe, daz wiêr iêr paider gotshovsser voit vnt shermer sein, vnt anderthalbe Friderich der Vuchs vnser diener vnt sein hovsfrowe var Dyemut, vnt iêr vrevnde; vnd muette der abt Walchu^on vnt der pharrer von Stregen an iêr gotshousse stat, daz Friderich der Vuchs vnt sein hovsfrowe iêr zvain gotshovssern paidev hintz Altenbu^erch vnt hintz Stregen nach aigens reht sherm vnt gvishait taten vber den chovf. Du lobt Friderich der Vuchs vnt var Dyemut sein hovsfrowe, daz si dazselbe aigen verantwurtten wolten vor allem rehte vnt sin ovch sein sherm vnt gvêer ze rehten iarn vnt ze rehten tagen, als lants reht vnt aigens reht ist, vnt taten daz gelub, paidev Friderich vnt var Dyemut in vnser hant vnt in des abtes hant, vnt seiner samnunge vnt in pharrer Wolframes hant, an iêr gotshovsse stat. Darzôe ovch lobt er Friderich mit sampt seiner hovsfrovn, daz si mit ier guetlihem willen derselben fumphtzige phunt phenninge, die man in geit vmbe iêr aigen ze Ekkenstain, dreizcig phunt an legen shullen an ander aigen, vnt sol daz selbe ebentewer sein des gotshovsse ze Altenbu^orch ze rehten iarn vnt ze rehten tagen, als daz reht vodert. Dennoch dar vber hat Vlreich der Vuchs von Shrettenstall, Fridereichs vater, den wier vorgenant haben, gesatzet mit seiner hovsfrovn vron Jevtten gunts vnt mit seiner chinde, Vlreichs, Ottoeins, Jeutten, Vlreichs vnt Leebeins gu^etleichen willen nach seins suns Fridereichs vnt nach seiner snuer vron Dyematen pet sein aigen ze Newenchyrchen, ze Chru^og, ze Gauderndorf, daz er in paiden emaln gesatzet het ze rehter margengab fuêr fumphtzige phunt phenninge, vnt hot daz getan mit solher peshaidenhait, suanne er zvissen sant Mychels tage vnt saut Georgen misse daz selbe aigen lôesen welle da fuer, vnt igelichez gesatzet sei, daz man im des stat shulle tun, vnt in sein niht iêrren shulle, doch also, svenne er gelôese daz selbe guet, als igeleichez steê, daz diselben phenninge daz gothshovsse ze Altenburch inne haben sol so lange, vntz daz Friderêich der Vuchs oder sein vrevnde aigen chovffen vmbe diselben fumphtzige phunt phenninge, daz dem gotshovss hintz Altenburch gvisse ebentewer sêi wider dtze aigen. Vnt ist ovch gelobt, daz paidev die dreizcig phunt, als oben geshriben stet, vnt ouch di fumphtcig phunt, als her nach geshriben ist, ob daz aigen mit anander geloest wert oder niht, an geleit shullen wern, nach shechs mannen rat, nach Ortolfes rat von dem Taurais, nach Hainreichs rat von Wiltperch, nach Gotschalichs rat von Vronhouen, nach Engelprehts rat von Chru^eg, nach der Grueber rat, Vlrichs vnt Otteins seins pruder. Vnt daz diê red vnt der gewerfte, als er reddelehen geshehen ist, vuerbaz stet peleib vnt vnzebrochen, des gib ich disen prief ze vrchunde dem gotshovsse hintz Altenbu^orch, versigelt mi meinem jnsigel, vnt hern Ortolfes jnsigel von Ronnenberch, vnt mit hern Hadmars jnsigel von Wintchel vnt mit hern Rapotes vnt hern Erchenprehts vnt mit hern Haidenreichs jnsigel, der pu^orkcrauen von Gorshe, diê pei dem gverfte gvesen sint vnt sein ouch gezeuge sint mit andern gezeugen, die also genant sint: daz her Hadmar der alt von Sunnenberch, her Adlolt von Cheiowe, her Hainreich sein sun, Wernher der Hevzze der rihter von Poelan Vlreich der Vuchs von Shretentall, Engelpreht vnt Albrecht di Vu^echse von Haselperch, Heinreich der Dachpech, Vlreich sein pruder, Charel von Stregen, Chunrat der Sultzer, Vlreich der Star, Ditmar von Altenbu^orch, vnt ander frumer lot genuch. Daz ist geshehen nach Christes gepuertte vber tousent iar, zvai hundert iar, in dem newenzigisten iar, datz Sultze in dem poumkarten, septimo Idus Maij.

Source Fulltext: BURGER, Urkunden Altenburg (=FRA II/21, 1865) S. 51-53