Ich Ludweich von Celkinge tun chunt allen den, di nu lembtich sint vnd hernach chomftich sint, di den gegenburtigen priue ansehent oder lesent, daz ich mit verdahtem mut mein selbes vnt mit meiner housvroun vron Offmein guntste, vnt ouch meiner sun Heinreichs, Marcharts vnd Ludweigs, vnd aller vnser gerben gutem willen, han gegeben zwai lehen ze Tevntzendorf, di vnser aigen gewesen sint, dem gotshous ze Altenburch mit allem vnserm rehte, vnd haben daz getan, du wir daz wol getun mahten, vnt wellen des selben aigens des vor bnanten gotshousse sherm sein, als landes reht ist, vnd haben des vnser trewe gegeben, ich, mein hovsvrowe vnd meinev chinde, di vor bnant sint. Vnd daz di rede vu^erbaz stet sei vnt vntzebrochen, des gib ich disen prive ze rehter vrchunde, versigelt mit meinen jnsigel. Des sint gezeuge her Rapot, her Erchenpreht, her Haidenreich, di purkcrauen von Gorse, Hadmar von Sunberch, Sefrid von Plenich, Alber, Vlreich vnd Wernhart di Strevnne von Swartzenowe, vnd ander vrume levt gnuch. Daz ist geschehen vnd ist der priue gegeben vber tousent iar, zwai hundert iar, in dem ainen vnt nevncigistem iar nach Christes gepurt, datz Wienne, an sant Erharts tage.

Source Fulltext: BURGER, Urkunden Altenburg (=FRA II/21, 1865) S. 60