Ich Weyckart von Winckhel, vnd wir Friedereich, Ortlieb vnd Weyckart sein sün, wir verichen offentleich an disem brief allen den die ihn sechent, lesent oder hörent lesen, dass wir noch vnser erben dhains lehenrechtens an der capellen datz dem Ludtweigs haben noch furbass haben schullen darumb, dass wir dieselben capelln auss vnser veste datz dem Ludtweigs herfür gelegt haben auf vnsern grundt durch bessrer sicherhait derselben vnser veste, vnd luben mit vnsern treuen an alles geuere, dass wir den abbt vnd das gottshauss ze Jeruss an dem lehenrecht noch an seinen zechenten nicht irren schullen, noch darnach greiffen, mit keinerley sache noch auch der pfarrkirchen zu den Japans ihrem recht nicht abnemen schullen, es sey an zehenten oder an andern pfarrlichen rechten, wie sie genandt sein, die sie alle vollkomenlich haben schullen an alle irresal, alss es von alter herkomen ist, vnd scholl auch die vorgenandt capelln besungen vnd bewart werden mit der heyligkeit vnnd mit alle dem das darzu gehört, alss es von alter herkomen ist, vnd schollen auch nicht mehr mueten. Vnd das dass alles dem vorgenanten gottshauss zu Jeruss vnd der pfarrkhirchen zu dem Japans stett vnd vnzerbrochen beleib, gib ich vorgenanter Weyckart zu einem wahren gezeigen diser sache disen brieff versigelten mit meinem anhangenden insigill, vnd wannd wir vorgenante Friedereich, Ortlieb vnd Weyckart des egenanten herrn Weyckart sune nicht aigener jnsigel haben, haben wir die erbern herren herrn Eberhardten vnd herrn Heinreichen von Walse, vnd herrn Reinprechten von Schonberch vnd Ortlieben vnsern vettern von der Tuenaw gebetten, die ir jnsigel nach vnser pett an diesen brieff gelegt habent, vnder der jnsigl wir vns verpindten alles dass stett ze halten vnd vnzebrochen, alss vorgeschriben ist. Geben nach Christe geburdt dreyzechen hundert iar, darnach in dem drey vnd fünfzigisten iar an sant Gilgen tag.

Source Fulltext: BURGER, Urkunden Altenburg (=FRA II/21, 1865) S. 231-232