Wir Seyfrid von gotes genaden abt ze Altenburch, vnd di sampnung gemain des selben gotshaus, vergehen offenleich an dem prief, vnd tun chunt allen den, di in sechent, lesent, oder horent lesen, daz der erber herr, her Chunrat von Gors, zden zeiten prior in vnserm convent ze Altenburch, vns vnd vnserm gotshaus recht vnd redleich gemacht vnd gegeben hat, zder zeit, vnd er iz wol getuen macht, lewterleich durich got, durich seiner vnd seiner vodern sel willen, vreis aigens zwaintzk vnd vier phunt phenning gelts Wienner muniz, der do ligent zehen schilling datz Godweinstorf, auf eym westiften lehen, vnd zwelif schilling datz Hetzleinstorf auf eym westiften hof, vnd ain phunt phenning gelegen datz Obern-Nelib auf zwain westiften hofsteten, vnd auf vberlent, auf weingaerten vnd auf aechern, vnd sibentzk phenning datz Fukla auf einer wies, vnd auf eym acher, vnd zehen phenning datz Newnchirichen, drey auf eym odrecht, vnd siben auf eym weingarten. Vnd di vorbeschribenn zwaintzk vnd vier phunt phenning gelts geuallent dem prior vnd dem sanchmeister, wer di sind in vnserm conuent, zehen vnd zwelif schilling phenning, der do ligent zehen schilling ze Godweinstorf auf eym westiften lehen, di man ierleich dient an sand Jorigen tag, vnd sibentzk ze Fukla auf einer wiz vnd auf eym acher, di weilein in Otten des Zechenten lehen gehort habent, di man ierleich dient an sand Michels tag, darvm si dem egenanten hern Chunraten vnserm prior vnd allen seinen vodern dreizzich mess sprechen schullen alle iar ewichleich von vnser vrawn schidung, di sew alle iar anheben schullen des nechsten tag nach sand Jorigen tag, vnd schullen di selben mess nach einander sprechen auf sand Benedikten altar in vnserm munster an vnderloz, also mit ausgenumen warten, daz der prior di egenant dreizzich mess von vnser vrawn schidung schol anheben vnd der funftzehen sprechen an vnderlaz, vnd ze hant des nechsten tag darnach schol der sanchmeister di andern fumftzehen mess anheben vnd di auch an vnderloz sprechen. — Iz schullen auch der prior vnd der sanchmaister vm siebentzk phenning, di in geuallent aus den egenanten zehen vnd zwelif schilling, vnd gelegen sind ze Fukla als vorgeschriben stet, dem obgnanten hern Chunraten prior in vnserm conuent sprechen viertzehen mess von vnsers herren purt, vnd siben von dem heiligen geist auf sand Johans altar in vnserm capitel an vnderloz, also weschaidenleich, daz der prior alle iar di ersten selen mess von gotes purt anheben sol an dem heiligen Christtag, di andern siben von dem heiligen geist sol der sanchmaister anheben an dem Phingsttag, vnd di nach einander sprechen an vnderloz. Vnd di andern obgnanten zehen vnd drithalb phunt phenning schullen geuallen in di gustrey also weschaidenlich, daz dem egnanten hern Chunraten vnd allen seinen vodern vnd nachchomen ze hilf vnd ze trost, wer zder selben zeit guster ist, weleuchteu sol zwai ewige liecht, ains in vnserm chor, daz tag vnd nacht vor gots leichnam prinnen sol, daz ander in vnserm munster vor vnser vrawn altar nur pei dem tag prinnen sol. Wer auer daz, obs der prior vnd der sanchmaister vnd der guster in vnserm conuent di vorgnanten vier vnd viertzk mess vnd di obgnanten zwai liecht liezzen abgen, des si ehaft not nicht enirret, des wir mit erbern lewten vberwert wurden, so sull wir abt Seyfrid ze Altenburch oder wer nach vns abt wirt daselben, nach des conuent rat die amptlewt ze red setzen darvm, ob iz in ze swer sei; darnach sol sich dann wer abt ze Altenburch ist, der vorbeschribenn gult gantz vnd gar vnderwinden, vnd sol di vorgnanten mess mitsampt den egnanten liechten wegen vnd vberbesen nach seinen trewn vnd nach seinen gewizzen in aller waiz vnd mazz als vorgeschriben stet. Vnd daz di red vnd das selgret hinfür also stet vnd vnuerchert ewichleich weleib, darvber so geben wir dem oftgnanten hern Chunraten vnserm prior vnd seinen vreunten Jansen dem Hunt von Gors, vnd Jacoben seinen prueder, vnd Chunraten dem Schiekken, vnd allen iren erben den offenn prief, versigelten mit vnsern vnd mit vnsers conuents anhangendem jnsigeln. Der prief ist gegeben nach Christes gepuert dreutzechen hundert iar, darnach in dem zwai vnd sechtzkisten iar , an dem heiligen Christtag.

Source Fulltext: BURGER, Urkunden Altenburg (=FRA II/21, 1865) S. 245-246