Wir Albrecht von gotes genaden bischof ze Passaw bechennen vnd tun kunt offenleich mit dem brief. Wand der erwurdig vnd vnser lieber in got der abbt vnd der conuent des chlosters ze Altenburch irn vnd desselben irs chlosters paumgarten, gelegen ze Zebing, durch pessers nutz willen machen vnd legen wellent zu einem weingartten, vnd wand wir sunder lieb hintz in vnd irem chloster haben, haben wir in durch vnser vnd vnsrer voruodern vnd nachkomen selhail willen vnd ze uoderist got ze lob di besunder genad getan, vnd tun auch, daz wir wizzentlaich vnd gäntzleich lassen haben den zehent der newrawt desselben weingartten, also daz si vnd ir nachkomen vns, vnserm gotshaus, vnd nachkomen dauon hinfür ewichleich dhainen zehent nicht geben noch raichen sullen dhains wegs, an geuerd. Vnd dez ze vrkunde geben wir in den brief, besigelten mit vnserm anhangunden jnsigel. Der geben ist ze Wienn, an nachsten Sunptztag nach sand Vlreichs tag, nach Christi geburde dreuzehenhundert iar, vnd in dem ainen vnd sibentzigisten iar.

Source Fulltext: BURGER, Urkunden Altenburg (=FRA II/21, 1865) S. 258-259