Wir Alber von gotes gnaden hertzog ze Österreich, ze Steyr, ze Kernden vnd ze Krayn, graf ze Tyrol etc., tun chunt vmb die zehen schilling Wienner phenning gelts, so die erbern vnd geistlichen lewte vnser lieb andechtig der abt vnd der conuent des gotzhauses ze Altenburg habent ze Wienn vor Kernertor auf behausten holden, in den ziegelöfenn, daz wir in die genad getan haben, vnd tun auch mit disem brief, daz man dieselben zehen schilling geltes von in nicht abledigen noch lösen sol, alz ez vormalz aufgesatzt vnd erfunden ist, vnd daz die bey demselben irem kloster ewichlich beleiben sullen, mit allen rechten vnd nutzen, alz si die vntz herbracht haben. Vnd haben in dieselb genad besunderlich darvmb getan, daz di egenanten phenning gult von vnsern vordern zu dem egenanten irm gotzhaus gegeben vnd chomen sind. Darvmb gebieten wir allen vnsern amptleuten vnd vndertanen, wie die genant sind, daz si in wider die vorgenante vnser gnad chain irrung, noch besuerung tun, noch yeman ander gestatten ze tun, in dhainen weg. Mit vrchund ditz briefs, geben ze Wienn, an Sunntag vor sand Niclas tag, nach Kristes gepurd dreutzehen hundert iar, darnach in dem zway vnd sibentzigisten jar.

Source Fulltext: BURGER, Urkunden Altenburg (=FRA II/21, 1865) S. 260