Wir Albrecht von gottes gnaden ertzhertzog ze Österreich, ze Steyr ze Kernden vnd ze Crain, graue ze Tyrol etc., bekennen, daz vns der ersam geistlich vnser lieber andechtiger der abbt ze Altenburgk an stat sein vnd des conuents daselbs fürbracht ainen brief, darinn jn weilend vnser voruordern Albrecht vnd Leupolt, hertzogen ze Österreich, begnadt haben, daz sy aus vnserm saltzsieden zw der Hallstat jerlich sechtzigk nakende fuder saltz haben vnd nemen, auch mautt vnd zollfrey vnd on alle ander jrrung füren sullen vnd mugen, vnd bitt vns diemieticlich, jn solhe gnad vnd gab genediclich zu bestetten vnd zu uernewen. Also haben wir angesehen den guten willen, so die benant vnser voruordern zu dem bemelten gotshaws gehabt haben, auch den loblichen gotsdinst, der daselbs teglich begangen wirdet, vnd haben jn dadurch solhe gnad vnd gabe jn von den bemelten vnsern voruordern getan als herr vnd landsfürst bestett confirmirt vnd vernewet, bestetten vnd confirmiren jn die auch wissentlich mit dem brief, also daz si der nw fürbaser genvssen vnd geprauchen sullen vnd mügen nach aller jrer notturfft on geuerde. Dauon gebiten wir dem gegenwärtigen vnd aynem yedem kunftigen vnserm ambtmann ze Gmunden, mauttern vnd zollnern, vnd allen andern vnsern vndertanen vnd getrewn, daz sy dem genanten abbt, seinem gotshaws vnd nachkomen solh saltz jerlich raichen vnd geben , auch mautt vnd zollfrey vnd on all ander jrrung fürfürn lassen, als sy das von alter herbracht haben nach jrer brief sag. Das maynen wir mit vrkund des briefs mit vnserm anhangunden jnsigl. Geben ze Lynntz, an Freytag vor dem Sunntag Jubilate, nach Christi geburde vierzehenhundert vnd in dem newnundfunftzigisten jaren. Dominus... in consilio.

Source Fulltext: BURGER, Urkunden Altenburg (=FRA II/21, 1865) S. 335-336