Raymundus miseratione diuina tituli sancte Marie Noue sancte Romane ecclesie presbyter cardinalis Gurcensis, ad vniuersam Germaniam, Daciam, Suetiam, Norwegiam, Frisiam, Brussiam, omnesque et singulas illarum prouincias ciuitates terras et loca etiam sacro Romano imperio in ipsa Germania subiecta et eis adiacentia apostolice sedis de latere legatus, uniuersis et singulis presentes literas inspecturis salutem in domino. Notum facimus, quod sanctissimus in Christo pater et dominus Alexander diuina prouidentia papa sextus et modernus concessit omnibus et singulis vtriusque sexus Christi fidelibus pro tuitione orthodoxe fidei contra Thurcos eiusdem fidei inimicos iuxta ordinationem nostram manus adiutrices porrigentibus preter jubileum et alias indulgentias, gratias et facultates, quas Christi fideles ipsi obtinere possunt visitando ecclesias per nos aut commisarios nostros deputandas, ac si visitassent basilicas vrbis tempore iubilei, prout in literis apostolicis desuper confectis plenius continetur, quod possint eligere confessorem idoneum, secularem vel regularem, qui eis semel in vita ab omnibus et singulis peccatis, excessibus, criminibus et delictis, etiam sedi apostolice generaliter vel specialiter reseruatis, exceptis, contentis in literis, que in die cene domini legi consueuerunt, absolutionem plenissimam impendere, ab aliis vero eidem sedi non reseruatis, vita eis comite , totiens quotiens eos absoluere et in mortis articulo ac etiam totiens, quotiens de eorum morte dubitatur, etiam si tunc eos decedere non contingat, plenissimam omnium peccatorum suorum remissionem eis impartiri valeat. Indulsit etiam sanctissimus dominus noster motu suo proprio, omnes et singulos Christi fideles huiusmodi ac eorum parentes et benefactores defunctos, qui cum caritate decesserunt, jn omnibus precibus, suffragiis, missis, elemosynis, ieiuniis, orationibus, disciplinis et ceteris omnibus spiritualibus bonis, que fiunt et fieri poterunt in tota vniuersali sacrosancta Christi ecclesia militante et omnibus membris eiusdem imperpetuum participes fieri. Et ne super premissis a quoquam verti possit in dubium, voluit ipse sanctissimus dominus noster, quod presentibus nostris literis tanta adhibeatur fides, quanta adhiberetur, si sub bulla sua plumbea expedite forent, necnon easdem sub quibuscunque generalibus vel specialibus de similibus gratiis et facultatibus forsan emandandis renouationibus et suspensionibus nullatenus comprehendi debere. Et quia deuotus in Christo Georgius Poltz ad ipsius fidei piam subuentionem et defensionem iuxta summi pontificis intentionem et nostram ordinationem, prout per presentes literas sibi in huiusmodi testimonium a nobis traditas approbamus, de suis bonis contulerit, ideo auctoritate apostolica nobis comissa ipsi, vt dictis gratiis et indulgentiis vti et gaudere possit et valeat, concedimus pariter et indulgemus per presentes. Datum sub sigillo nostro ad hoc ordinato die prima mensis Junii, anno domini Mcccccl. Forma absolutionis in vita totiens quotiens. Misereatur tui etc. Dominus noster Jehsus Christus per meritum sue passionis te absoluat, auctoritate cuius et apostolica mihi in hac parte commissa et tibi concessa ego te absolvo ab omnibus peccatis tuis. In nomine patris et filii et spiritus sancti, amen. Forma absolutionis et plenissime remissionis semel in vita et in mortis articulo. Misereatur tui etc. Dominus noster Jhesus Christus per meritum sue passionis te absoluat. Et ego auctoritate ipsius et apostolica mihi in hac parte commissa et tibi concessa te absoluo. Primo ab omni sententia excomunicationis maioris vel minoris, si quam incurristi. Deinde ab omnibus peccatis tuis contritis confessis et oblitis, conferendo tibi plenissimam omnium peccatorum tuorum remissionem, remittendo tibi penas purgatorii, in quantum claues sancte matris ecclesie se extendunt. In nomine patris et filii et spiritus sancti, amen.

Source Fulltext: BURGER, Urkunden Altenburg (=FRA II/21, 1865) S. 363-365