Nos Hermannus divina miseratione abbas ecclesiae Chotovvicensis omnibus, ad quos praesens scriptum pervenerit, salutem in domino. Rogati per reverendum in Christo patrem et dominum, dominum Wernhardum, venerabilem praepositum ecclesiae Vorovensis, ex una parte et Dytmarum plebanum de Hainvvelde ex altera parte, ut contractum infra scriptum celebratum inter ipsos nostris litteris firmare curaremus, quod et fecimus eorum precibus annuentes. Noverint igitur universi praesentes litteras inspecturi, quod idem dominus noster venerabilis praepositus Vorovvensis de voluntate et unanimi consensu totius conventus sui curiam eorum in Haunvelde extra forum sitam dicto Dytmaro plebano ibidem iure civili contulit sub hac forma, ut ipsam curiam infra triennium instauret aedificiis necessariis et honestis, insuper in festo beati Bartholomaei apostoli singulis annis unum talentum novorum denariorum Wiennensium pro iure civili, ut premisimus, una cum caeteris omnibus servitiis, quae alii coloni eorum ibidem solvunt, et ad consuetudinem provinciae approbatam solvat et ipse plebanus de curia eadem. Qui si ullo tempore negligens fuerit in premissis, ad modum alterius coloni poenae pro tali negligentia debitae subiacebit. Si vero idem plebanus in bis omnibus exsolvendis temeritate sua, quod absit, tentaverit reluctari et post trinam admonitionem, quae sex hebdomadarum currit spatio, non correxerit huiusmodi contumaciam et errorem, extunc omnino iure suo cadat et dicta curia cum omnibus sibi attinentibus ad dominum prepositum et ecclesiam suam libere devolvetur. Praeterea si processu temporis ipsum Dietmarum plebanum quocunque casu emergente ius, quod in eadem curia obtinet, contingat vendere, tenetur ex promisso eandem venditionem ipsis primitus exhibere et minore pretio quam extraneo curiam ipsi dare, prout boni et honesti viri inter ipsum dominum prepositum et ecclesiam suam ex una et saepedictum plebanum ex altera parte fuerint arbitrati, quam si forte tunc temporis dominus prepositus emere non valuerit aliquibus obstaculis prepeditus, eidem Dietmaro plebano non licebit ius suum alicui vendere preter ipsius domini prepositi licentiam specialem. In cuius rei testimonium presentem paginam sigilli nostri karaktere communimus. Datum in Chotevvico anno domini MCCLXXX, indictione octava. Testes vero, qui sunt in instrumento domini prepositi, etiam hic notamus: dominus Hermannus decanus, dominus Duringus plebanus, dominus Ditericus custos, dominus Conradus camerarius, magister Siboto, Waltherus teloniarius, Wlvingus Stadeler, Sidlo pistor, Eberhardus officialis, Fridericus Wchs, Leutoldus Pringez et alii quam plures.

Source Fulltext: FUCHS, Göttweig III (=FRA II/55, Wien 1902) S. 391-392